तळोदा (नंदुरबार) : भजन गात असतानाच भजनी मंडळातील सदस्याचा दुर्दैवी मृत्यू झाल्याची घटना तळोद्यात घडली. शहरातून अमरनाथ यात्रेला (Amarnath Yatra) जाणाऱ्या भाविकांना मिरवणुकीद्वारे निरोप (Taloda) देताना मेन रोडवरील काका शेठ मंदिराजवळ ही दुर्दैवी घटना घडली. त्यामुळे शहरात हळहळ व्यक्त करण्यात येत आहे. (Live Marathi News)

जम्मू– काश्मीरमधील पवित्र अमरनाथ यात्रेसाठी तळोद्यातील भाविक आज (२६ जून) रवाना होणार होते. त्यासाठी मेन रोडवरील दत्त मंदिरापासून मिरवणुकीने भाविकांना निरोप देण्यासाठी शहरातील नागरिक जमा झाले होते. यावेळी श्री दत्त भजनी मंडळाच्या सदस्यांनी भजन कीर्तन करत भजनाद्वारे भाविकांना निरोप देताना वातावरण भक्तीमय बनवण्यास सुरुवात केली.

चक्‍कर येवून जमिनीवर कोसळले

भजनी मंडळातील सदस्य आनंदा नरोत्तम सूर्यवंशी हे भजन गात होते. 'भोले बाबा ने बुलाया है' असे भजन त्यांच्या तोंडून बाहेर येत होते. त्याचवेळी अचानक आनंदा सूर्यवंशी चक्कर येऊन जमिनीवर कोसळले. ते बघून सोबत असलेल्यांना धक्काच बसला. त्यांना तातडीने जवळच वैद्यकीय तपासणीसाठी घेऊन जाण्यात आले. वैद्यकीय तपासणीत त्यांचे रक्तदाब कमी होऊन त्यांना हृदयविकाराचा तीव्र झटका आल्याचे लक्षात आले. तातडीने त्यांना उपजिल्हा रुग्णालयात पाठविण्यात आले. मात्र त्यांची प्राणज्योत मालवली होती.