सागर निकवाडे  

नंदूरबार : राज्यात गेल्या काही दिवसांपासून कुठेजी पाऊस पडलेला नाही. नंदुरबार (Nandurbar) जिल्ह्यात देखील मागील महिनाभरापासून पावसाने दडी मारली आहे. यामुळे पिकांना वाचविण्यासाठी वरुण देवाला आराधना केली जात आहे. याच दरम्यान नंदुरबार जिल्ह्यातील प्रकाश (Prakasha) येथे पावसासाठी देवाला साकडे घालण्यात आले. (Tajya Batmya)

साधारण महिनाभरापासून नंदुरबार जिल्ह्यात पावसाने पाठ फिरवली आहे. पिकांना पाण्याची आवश्यकता असताना पाऊस पडत नसल्याने शेतकऱ्यांचे (Farmer) डोळे आकाशाकडे आहेत. पाऊस नसल्याने पीक करपण्यास सुरुवात झाली असून ग्रामीण भागात पाणीटंचाईची समस्या ही समोर येऊ लागली आहे. आता पाऊस आला नाही तर आगामी काळात परिस्थिती गंभीर होणार आहे. 

महादेव मंदिरात भरले पाणी 

पिकांना जीवदान मिळावे आणि ग्रामीण भागातील पिण्याचा पाण्याचा प्रश्न सुटावा, म्हणून प्रकाशा येथील गावकरी आणि शेतकऱ्यांनी पुरातन निळकंठेश्वर महादेव मंदिरात पाणी भरले असून देवाला पाण्यासाठी साकडे घातले आहे. ग्रामस्थांनी पाण्यासाठी देवाला साकडे घातले असून या ठिकाणी जोपर्यंत समाधानकारक पाऊस होणार नाही; तोपर्यंत मंदिरातील पाणी काढणार नाहीत असा संकल्प त्यांनी केला आहे.