सागर निकवाडे

नंदूरबार : नंदूरबार जिल्ह्यातील मोगराणी गावात २ घरांना अचानक आग (Fire) लागून खाक झाल्याची धक्कादायक घटना घडली आहे. या आगीत (Nandurbar News) दोन्‍ही घर जळून खाक झाले. यात धान्यासह घरगुती सामान जळून खाक झाले असून लाखो रुपयांचे नुकसान झाले आहे. महसूल विभागाने पंचनामा करून नुकसानग्रस्त कुटुंबांना मदत देण्याची मागणी होत आहे. (Letest Marathi News)

मोगराणी (जि.नंदुरबार) गावातील रहिवासी लक्ष्मण सामा वळवी व लालसिंग अर्जुन पाडवी यांची घरे एकत्र होती. सुरुवातीला एका घराला आग लागल्यानंतर उष्णता व हवेमुळे आगीचा मोठ्या प्रमाणावर फैलाव झाल्याने दोन्ही घरे जळून खाक झाली आहे. या आगीमध्ये घरातील धान्य, कपडे, घरगुती सामान व फर्निचर लाकडी दांड्या, खांबे सर्व जळून भस्म झाले आहे.

दोन्ही परिवार उघड्यावर

आगीची माहिती मिळताच स्थानिक नागरिकांनी मिळेल त्या भांड्यात पाणी घेऊन आग विझविण्याचा प्रयत्न केला. परंतु आग एवढी भीषण होती की आग विझविणे कठीण झाले. धान्यासह कपडे व सर्व संसार उपयोगी वस्तू आगीमुळे जळून खाक झाल्याने दोन्ही परिवार उघड्यावर आले आहे. घरांना आग लागल्यानंतर नागरिकांनी बाहेर पडून आपला जीव वाचविला त्यामुळे जीवित हानी टळली आहे.

मदतीची आस

गावातील ज्येष्ठ नागरिकांनी नुकसानग्रस्त कुटुंबांची भेट घेऊन सदर कुटुंबांना महसूल विभागाने पंचनामा करून मदत द्यावी; अशी मागणी नागरिकांनी केली आहे. अचानक लागलेल्या या आगीत घरातील सर्वसामान जळून खाक झाले आहे. आग नेमकी कशामुळे लागली याबाबत अद्यापही स्पष्टता नाही.