सागर निकवाडे 

नंदुरबार : सातपुड्याच्या दुर्गम भागात आजही डाकीण ठरवून त्रास देण्याचा घटना समोर येत आहेत. अशीच एक घटना धडगाव तालुक्यातील वावी गावात समोर आली आहे. डाकीण असून जादूटोणा करत असल्याच्या संशयावरून गावातील काही मंडळी महिलेला त्रास देत होते. या त्रासाला कंटाळून महिलेला अखेर गाव सोडून जावे लागले आहे.

सातपुड्याच्या पायथ्याशी असलेल्या दुर्गम भागातील वाडे- पाडा वस्तीवर आजही अंधश्रद्धेला वाव दिला जात असतो. हे प्रकार सातत्याने समोर देखील येत आहेत. (Nandurbar) दरम्यान धडगाव तालुक्यातील वावी या गावातील बालदिबाई ठाकरे ही महिला डाकीन असून ती गावातील लोकांना जादूटोना करते. ती जादूटोणा करत असल्याने गावातील लोक सतत आजारी पडतात; असा आरोप करत कागडा ठाकरे, आमशा ठाकरे यांनी सदर महिलेला वारंवार त्रास दिला जात होता. इतकेच नाही तर सदर महिलेला जीवे मारण्याची धमकी दिली. 

अंनिसच्या मदतीने पोलिसात तक्रार 

गावात होणाऱ्या वारंवारच्या त्रासाला कंटाळून सदर महिला गाव सोडून निघून गेली होती. मात्र तरीही त्रास सुरू असल्याने सदर महिलेने (ANIS) अंधश्रद्धा निर्मूलन समितीकडे मदत मागितली. त्यानंतर शहादा उपविभागीय पोलीस अधिकारी दत्ता पवार यांची भेट घेऊन सदर प्रकार सांगत तक्रार केली. पोलिसांनी सदर प्रकरणात कारवाईची अश्वासन दिले आहे.