तळोदा (नंदुरबार) : मोरवड (ता. तळोदा) येथून धानोरा येथे बहिणीकडे जात असलेला भाऊ व त्याचा पुतण्या या दोघांचा रस्त्याच्या कडेला लपून असलेल्या बिबट्यासोबत सामना झाला. या वेळी भांबेरी उडाल्याने दोघेही मोटारसायकलवरून पडल्याने गंभीर जखमी झाले. (nandurbar-news-taloda-forest-aria-leopard-on-the-way-to-sister-The-grunt-came-closer)

तळोदा तालुका अनेक वर्षांपासून बिबट्यांसाठी नंदनवन ठरला आहे. रोज कोणत्यातरी गावशिवारात बिबट्याच्या पाऊलखुणा दिसत असतात. शनिवारी तळोदा येथे एका दुकानावर काम करणारे राहुल पाटील व त्यांचा पुतण्या दगा पाटील दोघेही मोरवडला आपल्या गावी पोचले. तेथून राहुल यांना धानोरा येथे बहिणीला भेटायला जायचे होते. त्यांनी पुतण्या दगा यालाही सोबत घेतले व दोघेही धानोऱ्याला जात होते.

बिबट्या गुरगुरत जवळ आला

उसाच्या शेताजवळ बिबट्या रस्त्यावर समोरच येऊन उभा ठाकल्याने दोघांची भंबेरी उडाली व दोघेही मोटारसायकलवरून खाली पडल्याने गंभीर जखमी झाले. बिबट्या दोघांच्या जवळ येत असतानाच, राहुल यांनी एक्सिलेटरद्वारे सायलेन्सरचा आवाज वाढवला. त्यामुळे बिबट्या आणखी जोरात गुरगुरत असल्याने दोघांनाही समोर साक्षात मृत्यू दिसत होता. मात्र दैव बलवत्तर म्हणून बिबट्या तेथून शेतात पसार झाला. त्यानंतर दोघांनी भ्रमणध्वनीद्वारे मित्रांना कळविल्यानंतर त्यांना तळोदा रुग्णालयात दाखल करण्यात आले. वन विभागालाही याबाबत माहिती कळविण्यात आली. दरम्यान, वन विभागाने पंचनामे केले असले, तरी बिबट्याची दहशत दिवसेंदिवस वाढत असून, वन विभाग मात्र कुठेही पिंजरा लावावयास तयार नसल्याचे शेतकऱ्यांचे म्हणणे आहे.