सागर निकवाडे
नंदूरबार : विधानसभा निवडणुकीत महायुती असताना माझ्या विरोधात हिना गावित यांनी बंडखोरी केली. हि बंडखोरी मुख्यमंत्री देवेंद्र फडणवीस यांच्या सांगण्यावरून केल्याचे हीना गावित सांगतात. मात्र त्या मुख्यमंत्र्याची बदनामी करत असल्याचा आरोप शिवसेना शिंदे गटाच्या आमदार आमश्या पाडवी यांनी माजी खासदार हिना गावित यांच्यावर केला आहे. 

नंदुरबार कृषी उत्पन्न बाजार समितीच्या विविध विकास कामांचे भूमिपूजन सर्वपक्षीय नेत्यांच्या उपस्थितीमध्ये संपन्न झाले. या कार्यक्रमाला सेना संपर्क प्रमुख माजी आमदार चंद्रकांत रघुवंशी, अक्कलकुवा मतदार संघाचे आमदार अमाश्या पाडवी, कॉंग्रेसचे आमदार शिरीषकुमार नाईक, भाजपा आमदार राजेश पाडवी हे उपस्थित होते. या कार्यक्रमात बोलताना सर्वपक्षीय आमदारांनी माजी मंत्री डॉ. गावित आणि परिवारावर टीका केली. 

गावित कुटुंबावर घणाघाती टीका 

सदरच्या कार्यक्रमात बोलताना शिवसेना आमदार आमश्या पाडवी यांनी माजी मंत्री विजयकुमार गावित आणि माजी खासदार डॉ. हीना गावित तसेच जिल्हा परिषद अध्यक्ष सुप्रिया गावित यांच्यावर घणाघाती टीका केली आहे. यावेळी बोलताना आमदार पाडवी यांनी गावित कुटुंब हे कार्यकर्त्यांच्या वापर करून फेकून देतात. याचा अनुभव मी घेतला आहे. त्यांच्या निवडणुकीत मी प्रमाणिकपणे महायुतीचे काम केले. मात्र त्यांनी विधानसभेत माझ्याच विरोधात उमेदवारी केल्याचे म्हटले आहे. 

स्थानिक स्वराज्य संस्थांच्या निवडणुकीत तिढा?

नंदुरबार जिल्हा परिषद व पंचायत समितीच्या निवडणूक येऊ घातल्या आहेत. या येणाऱ्या स्थानिक स्वराज्य संस्थाच्या निवडणुकीत महायुतीमध्ये जिल्ह्यात सर्व काही आलबेल नसेल याचे संकेत पाडवी यांनी दिला आहे. सध्या जिल्हा परिषदेवर अध्यक्ष पद गावित परिवारात असून आगामी निवडणुकीत गावितांच्या विरोधात हि निवडणूक असणार कि वरिष्ठ नेते सर्व काही आलबेल करून टाकतील हा पाहणे महत्वाचे ठरणार आहे.