सागर निकवाडे 

नंदुरबार : राज्यात सर्वत्र पावसाचा जोर कायम आहे. यामळे राज्यातील अनेक भागात पूरस्थिती निर्माण झाली आहे. रस्त्यावर पुराचा पाणी तसेच काही ठिकाणी कमी उंचीचे पूल देखील पाण्याखाली गेले आहेत. यामुळे नंदुरबार जिल्ह्यातील लांब पल्ल्याच्या अनेक बस फेऱ्या रद्द झाल्या आहेत. 

राज्यातील बहुतांश भागात पावसाची संततधार सुरु आहे. काही भागात तर मुसळधार (Rain) पाऊस सुरु असल्याने राज्यातील पूरसदृश स्थिती आणि अतिवृष्टीमुळे अनेक मार्ग वाहतुकीसाठी बंद झाले आहेत. बऱ्याचदा तासनतास पूर ओसरत नसल्याने गाड्या मार्गावरच उभ्या करून ठेवाव्या लागतात. यात राज्य परिवहन महामंडळाच्या बस (MSRTC Bus) देखील अडकल्याने प्रवाशांना तात्कळत बसावे लागते. शिवाय चालक वाहकांना देखील यात त्रास होत असतो. त्यामुळे अनेक आगारातून लांब पल्ल्याच्या बस फेऱ्या रद्द करण्यात आल्या आहेत. 

नंदुरबारमधून ४० फेऱ्या रद्द 

एसटीच्या नंदुरबार (Nandurbar) जिल्ह्यातील ४० पेक्षा अधिक फेऱ्या रद्द करण्यात आल्या होत्या. यामुळे एसटी महामंडळाला लाखो रुपयांचा फटका सहन करावा लागत आहे. आधीच महामंडळ तोट्यात चालू आहे. त्यातच ४० पेक्षा अधिक फेऱ्या रद्द झाल्याने महामंडळाला पुन्हा पावसामुळे फटका बसला आहे. नंदुरबार जिल्ह्यातील चारही आगारांमधील लांब पडल्याच्या बस रद्द झाल्या आहेत. नंदुरबारपासून मुंबई, नाशिक, पंढरपूर, पुणे, औरंगाबाद, नगर या भागात बस जात असतात. मात्र या जिल्ह्यांमध्ये पावसाचे प्रमाण अधिक असल्याने बस गाड्या रद्द होत आहेत.