सागर निकवाडे 
नंदुरबार : नंदुरबार जिल्ह्यातून जाणाऱ्या धुळे- सुरत राष्ट्रीय महामार्गावर असलेल्या कोंडाईबारी घाटात दुपारच्या सुमारास भीषण अपघात झाला. भरधाव वेगाने जाणाऱ्या एका ट्रकचे ब्रेक फेल झाल्याने चालकाचे नियंत्रण सुटून ट्रक पलटी झाला. ज्यामुळे ट्रकचे दोन तुकडे झाले असून अपघातात ट्रकचा चालक आणि सहचालक गंभीर जखमी झाले आहेत. त्यांना तात्काळ उपचारासाठी नंदुरबार जिल्हा रुग्णालयात दाखल करण्यात आले आहे.

नंदुरबार जिल्ह्यातील कोंडाईबारी घाट रस्त्यावर नेहमीच अपघात होत असतात. आज झालेल्या अपघातग्रस्त ट्रक रायपूरहून राजकोटच्या दिशेने माल घेऊन मार्गस्थ झाला होता. हा ट्रक कोंडाईबारी घाटातून जात असताना चालकाचा ताबा सुटला. यात ब्रेक फेल झाल्यामुळे ट्रक अनियंत्रित झाला आणि एका मोठ्या धडकेनंतर त्याचे अक्षरशः दोन तुकडे होऊन ट्रक रस्त्याच्या कडेला पलटी झाला.  

दोघेजण केबिनमध्येच अडकले 

अपघात इतका भीषण होता की, मालाने भरलेला ट्रक पूर्णपणे चकणाचूर झाला आहे. तर अपघातानंतर ट्रकचे कॅबिन देखील पूर्णपणे दाबले गेले होते. यामुळे ट्रकचा चालक आणि सहचालक वाहनाच्या केबिनमध्ये दाबले गेले होते. स्थानिक नागरिकांनी आणि मदतीसाठी धावलेल्या कर्मचाऱ्यांनी त्यांना बाहेर काढत तातडीने त्यांना उपचारासाठी नंदुरबार जिल्हा रुग्णालयात पाठवण्यात आले. त्यांची प्रकृती गंभीर असल्याचे सांगितले जात आहे.

वाहतूक विस्कळीत 

या भीषण अपघातानंतर ट्रकमधील संपूर्ण लोखंडी सळ्यांचा माल रस्त्यावर विखुरला होता. यामुळे महामार्गावर वाहतूक काही काळ विस्कळीत झाली होती. अपघाताची माहिती पोलिसांना मिळताच पोलिसांनी घटनास्थळी पोहोचून वाहतूक सुरळीत केली. या अपघाताचा पुढील तपास स्थानिक पोलीस करत आहेत.