सागर निकवाडे 
नंदुरबार : धडगाव पंचायत समितीच्या कार्यालय बांधकामाचे भूमिपूजन पार पडले आहे. मात्र या एकाच कामाचे भूमिपूजन दोनदा झाले आहे. अर्थात इमारत उभारणीवरून भाजप आणि शिवसेना आमने सामने आले असून यावरून दोन्ही पक्षात श्रेय वादाची लढाई सुरु झाली आहे. तर यावरून आमदार आमश्या पाडवी यांनी नाव न घेता गावित परिवार हल्लाबोल केला आहे. 

नंदुरबार जिल्ह्यातील अक्कलकुवा- अक्राणी मतदार संघाचे आमदार आमश्या पाडवी यांनी धडगाव पंचायत समितीच्या नवीन इमारतीच्या भूमिपूजनावरून भाजप आणि शिवसेना शिंदे गटामध्ये सुरू असलेल्या श्रेयावादाच्या लढाईवर आपले मत व्यक्त केले आहे. आमदार पाडवी यांच्या म्हणण्यानुसार धडगाव येथील पंचायत समितीच्या नवीन इमारतीसाठी जमीन मंजूर झाली असून आज त्याचे भूमिपूजन करण्यात आले आहे. ते म्हणाले की ही इमारत अतिशय चांगली होणार आहे. त्यांनी खास करून या इमारतीच्या मंजुरीसाठी प्रयत्न केलेल्या सभापतींचे आणि इतर पदाधिकाऱ्यांचे आभार मानले.

काहींना अजूनही स्वप्न पडताय 

आमश्या पाडवी यांनी असेही सांगितले की, काही लोकांना अजूनही असे स्वप्न पडत आहे की ही वस्तू त्यांची आहे आणि त्यांनी ती करायला पाहिजे. कोणतेही सरकार असो, जेव्हा एखादी वास्तू मंजूर होते, तेव्हा जो आमदार किंवा जिल्हा परिषद सदस्य असतो. त्याला त्याचे अधिकार असतात. काही लोक अजूनही स्वतःला मंत्री, अध्यक्ष किंवा खासदार समजत आहेत. त्यांचे कार्यकर्तेही असेच मोठे स्वप्न पाहत आहेत. पण हे योग्य नाही, असेही पाडवी म्हणाले.

मतदारसंघाचा आमदार म्हणून, मी आज जाहीर करतो की या इमारतीचे उद्घाटन मी केले आहे. माझ्यासोबत शिवसेनेचे सर्व पदाधिकारी, ज्यात सभापती यांचा समावेश आहे. त्यांनी जोर देऊन सांगितले की या बिल्डिंगचे भूमिपूजन त्यांनीच केले आहे आणि ज्यांना स्वप्न पडत आहे, की ही इमारत त्यांची आहे. ते त्यांची पंचायत समितीची दुसरी बिल्डिंग बांधून घेतील.