सागर निकवाडे

नंदुरबार : धडगाव तालुक्याला नंदूरबार जिल्ह्याशी जोडणारा चांदसैली रस्त्याची प्रचंड दुरावस्था झाली आहे. घाटमार्गे असलेला हा रस्ता सातपुडा आणि नंदुरबार (Nandurbar News) जिल्ह्याशी जोडणारा असून संबंधीत विभागाकडून या रस्त्याच्या दुरुस्तीकडे दुर्लक्ष होत आहे. अनेक ठिकाणी रस्त्याचा भराव खचला असून वाहन चालकांसह प्रवाशांना जीव मुठीत घेवून प्रवास करावा लागत आहे. संबंधीत विभागाने चांदसैली (Chandsaili) रस्त्याची दुरुस्ती करावी, अशी मागणी होत आहे. (Maharashtra News)

धडगाव तालुक्यातील चांदसैली हा रस्ता धडगाव येथे येण्यासाठी सोयीचा आहे. कारण चांदसैली मार्गे धडगावला ये-जा करण्याचे अंतर कमी असते. गेल्या २ वर्षांपासून चांदसैली घाटातील रस्त्याची प्रचंड दुरावस्था झाली आहे. मध्यंतरी या रस्त्याच्या दुरावस्थेमुळे एसटी महामंडळाची बस देखील बंद झाली होती. आता पुन्हा या रस्त्याची दुरावस्था झाली असल्याने वाहन चालक व प्रवाशांसाठी हा मार्ग धोकेदायक ठरत आहे. धडगाव ते तळोदा (Taloda) असा प्रवास करतांना चांदसैली घाट येत असतो. परंतू अनेक ठिकाणी रस्त्यावर खड्डे पडल्याने भराव खचल्याने रस्ते अरुंद झाले आहे. मागील दोन वर्षापासून चांदसैली रस्त्याची जैसे थे अवस्था असल्याने संबंधीत विभागाचे याकडे दुर्लक्ष असल्याचे दिसून येते. समोरुन येणार्‍या वाहनाला पुढे मार्गस्थ करतांना अनेक अडचणींना सामोरे जावे लागते.

जिल्हाधिकारींच्‍या आदेशाला केराची टोपली

नंदुरबारचे जिल्हाधिकारी यांनी सदर रस्त्याचे दुरुस्तीचे आदेश अधिसूचना काढून संबंधीत विभागाला दिले होते. परंतू जिल्हाधिकारी यांच्या आदेशाला केचराची टोपली दाखविण्यात आली. रस्ता दुरुस्ती न करता काही ठिकाणी संरक्षण भिंती बांधल्याचे बोलले जात आहे. रस्त्याची दुरावस्था जैसे थे असून सार्वजनिक बांधकाम विभागाने या रस्त्याची दुरुस्ती करावी, अशी मागणी होत आहे.