सागर निकवाडे 

नंदूरबार : नंदुरबार जिल्ह्यातील अतिदुर्गम भाग समजल्या जाणाऱ्या धडगाव शहरात नोकरीचे आमिष दाखवत एका सामान्य कुटुंबातील तरुणाला १२ लाख ५० हजार रुपयांची फसवणूक केल्याचा धक्कादायक प्रकार समोर आला आहे. संबंधित तरुणाचे वडील चहाची टपरी चालवतात. तर आई फळ विकून आपला उदरनिर्वाह करते. फसवणूक झाल्यानंतर कुटुंबीयांवर मोठ संकट आलो असून त्यांनी धडगाव पोलीस ठाण्यात फसवणुकीचा गुन्हा दाखल केला आहे.

कॉम्प्युटर इंजीनियरिंग शिक्षण झालेला योगेश आई- वडिलांसोबत धडगाव शहरात राहतो. वडील चहाची टपरी चालवतात, तर आई रस्त्यांवर फळे विकण्याचं काम करत त्यांचा उदरनिर्वाह चालतो. दरम्यान कोरोना काळात नोकरी गेल्यानंतर योगेश हा घरी राहत होता. त्याच दरम्यान आकाश अहिरे नामक पोलीस अधिकाऱ्याच्या भावाने त्याला नोकरीचे आमिष देत त्यांना स्टेट बँक ऑफ इंडिया मुंबई शाखेत नोकरी लावून देण्याचे सांगत त्याच्याकडून १४ लाख रुपयांची मागणी केली.  

बनावट जॉइनिंग लेटर 

मात्र एवढे पैसे देण्यास नकार दिल्यानंतर १२ लाख ५० हजार रुपये देण्याचं ठरलं. टप्प्याटप्प्याने योगेश मोरे या सुशिक्षित बेरोजगाराने हे पैसे संबंधितांच्या बँक अकाउंटवर तर कधी कॅश स्वरूपात टप्प्याटप्प्याने पाठवायला सुरुवात केली. टप्प्याटप्प्याने पैसे दिल्यानंतर एका महिलेने त्याला स्टेट बँक ऑफ इंडिया मुंबई शाखेत जॉइनिंग लेटर व्हाट्सअपच्या माध्यमातून पाठवले. तर तुला मुंबई शाखेत जॉइनिंगसाठी बोलावलं असल्याचे देखील महिलेने सांगितलं. त्यानुसार योगेश कागतपत्र पडताळणीसाठी मुंबईला पोहोचला.  

चार जणांविरोधात गुन्हा दाखल 

मुंबईतील अनेक स्टेट बँकेच्या शाखेचा पत्ता देण्यात आला होता. मात्र तिथे गेल्यानंतर त्याला वारंवार फिरवण्यात आले. त्यानंतर फसवणूक झाल्याचे लक्षात आले. फसवणूक झाल्याचे लक्षात येताच योगेशने संबंधित महिला आणि त्या चारही जणांना संपर्क केल्यानंतर पैशाची मागणी केली. मात्र वारंवार पैसे मागूनही देत नसल्याने अखेर योगेशने पोलीस स्टेशन गाठत फसवणूक करणाऱ्या या चौघांविरोधात धडगाव पोलीस ठाण्यात गुन्हा दाखल केला आहे.