नंदुरबार : नंदुरबार जिल्ह्यातील देवगोई ते दहेल रस्त्यादरम्यान एका आयशर ट्रकचा भीषण अपघात झाला आहे. देव मोगरा मातेच्या यात्रेतून परतणाऱ्या भाविकांवर काळाने घाला घातला आहे. बँडची गाडी उलटल्याने १२ जण गंभीर जखमी झाले आहेत. जखमींना मोलगी ग्रामीण रुग्णालयात उपचारासाठी दाखल करण्यात आलं आहे. अपघातात बँड गाडीचे मोठ्या प्रमाणात नुकसान झालं आहे. बेशिस्तपणे वाहन चालवणाऱ्या चालकाविरोधात मोलगी पोलीस ठाण्यात गुन्हा दाखल करण्यात आला आहे.

महाशिवरात्रीला आक्रित घडलं

दरम्यान, तीन दिवसांपूर्वी असाच एक भीषण अपघात घडला होता. महाशिवरात्री निमित्त भजनासाठी पहाटे अर्टीगा गाडीत पाच युवक जात असताना नंदुरबार शहरातील वीर महाराणा प्रताप ते खोडाई देवी मंदिर रस्त्यावर भरधाव वेगातील आर्टिगा गाडी विद्युत खांबावर आदळल्याने झालेल्या अपघातात एकाचा मृत्यू झाल्याची घटना बुधवारी पहाटे घडली. अपघातात चौघे जखमी झाले असून त्यांच्यावर जिल्हा रुग्णालयात उपचार सुरू आहेत. याबाबत आर्टिगा चालकावर गुन्हा दाखल करण्यात आला आहे.