सागर निकवाडे,

नंदुरबार : शहादा तालुक्यातील असलोद येथे दारूबंदीसाठी उभारण्यात आलेल्या लढ्याला अखेर यश आलं आहे. दारूबंदीसाठी बॅलेट पेपरवर झालेल्या मतदान प्रक्रियेत महिलांचा विजय झाला असून आता गावात दारूबंदी होणार असल्याचं निश्चित झालं आहे. अवैध व्यवसायांच्या विरोधात झालेल्या या विजयानंतर गावकऱ्यांनी एकच जल्लोष केला.

असलोद येथे 2012 पासून दारूबंदीसाठी महिलांचं आंदोलन सुरू आहे. गावकरी, महिला आणि सामाजिक संघटनांनी हा लढा उभारला होतं. दारूमुळे अनेक कुटुंबात कलह निर्माण होत आहे. तर गावातील तरुण व्यसनाधीन होत असून अनेकांचे परिवार उध्वस्त झाले. त्यामुळे गावात दारूबंदी करण्यासाठी महिला एकटवल्या. सर्वांनी एकत्र येत मतदानाची मागणी केली होती. अखेर 14 वर्षांनी प्रशासनाने ही मागणी मंजूर केली. त्यानंतर रविवारी गावात दारूबंदीसाठी बॅलेट पेपरवर मतदान घेण्यात आलं.

या मतदानाच्या वेळी महिलांचा सहभाग अधिक दिसून आला. रविवारी सकाळपासूनच मतदानासाठी महिलांमध्ये मोठ्या प्रमाणात उत्साह दिसून आला. दारूबंदीसाठी मतदान घेणारे असलोद हे जिल्ह्यातील पहिले गाव ठरले आहे. संपूर्ण मतदान प्रक्रियेदरम्यान गावात मोठा पोलिस बंदोबस्त ठेवण्यात आला होता.

उभी बाटली, आडवी बाटली चिन्ह

या मतदान प्रक्रियेत उभी बाटली आणि आडवी बाटली अशी दोन चिन्ह होती. 1 हजार 216 महिला मतदारांपैकी 677 महिला मतदारांनी आपला मतदानाचा हक्क बजावला. त्यानंतर सायंकाळी सहा वाजता मतमोजणी प्रक्रियेला सुरुवात झाली. या मतमोजणी प्रक्रियेत आडव्या बाटलीला 612 मते मिळाल्याने सामाजिक कार्यकर्त्यांनी आणि महिलांनी सुरू केलेल्या लढ्याला यश आलं आहे.

दरम्यान, निकालानंतर गावातील महिलांनी सांगितले की, आमच्या एकजुटीमुळे व्यसनाने गावातील उध्वस्त होणारे संसार वाचणार असल्याचा आनंद आहे. आज झालेल्या निवडणूक प्रक्रियेच्या निकालाकडे संपूर्ण जिल्ह्याचे लक्ष लागून होते गावात जल्लोष केला जात आहे.