संजय सूर्यवंशी, साम टीव्ही

नांदेड : आगामी निवडणुकीच्या तोंडावर अनेक राजकीय पक्षांनी मोर्चेंबाधणी करायला सुरुवात केली आहे. एकीकडे काही पक्षात नेत्यांचे पक्षप्रवेश सुरु आहेत. दुसरीकडे ठाकरे गटाचा पक्षातील अंतर्गत वाद चव्हाट्यावर आला आहे. नांदेडमध्ये शिवसेनेचे संपर्कप्रमुख आणि माजी जिल्हाप्रमुखांमध्ये धक्काबुक्की झाल्याची घटना उघडकीस आली आहे. यावेळी नांदेडची शिवसेना बबन थोरातांनी विकली, असा गंभीर आरोप देखील माजी जिल्हाप्रमुख बंडू खेडकर यांनी केला आहे. नांदेडमधील घटनेने राजकीय चर्चांना उधाण आलं आहे.

नांदेडच्या ठाकरे शिवसेनेमध्ये आज शासकीय विश्रामगृह येथे जबरदस्त राडा झाल्याची माहिती मिळाली आहे. ठाकरे शिवसेनेचा आज नांदेड शहरामध्ये मेळावा आहे. या मेळाव्यासाठी नांदेड जिल्ह्याचे संपर्कप्रमुख बबन थोरात हे नांदेडमध्ये आले होते. परंतु मेळाव्या आधीच ठाकरे शिवसेनेच्या माजी जिल्हाप्रमुख बंडू खेडकर आणि संपर्कप्रमुख बबन थोरात यांच्यामध्ये जबरदस्त धक्काबुक्की झाल्याची कबुली खुद्द माजी जिल्हाप्रमुख बंडू खेडकर यांनी दिली.

'संपर्कप्रमुख बबन थोरात यांनी नांदेडची शिवसेना विकली आहे. पैसे घेऊन पदे वाटप करत असल्याचा गंभीर आरोप देखील यावेळी माजी जिल्हाप्रमुख बंडू खेडकर यांनी बबन थोरात यांच्यावर केले. बबन थोरात जेव्हा जेव्हा नांदेडमध्ये येतील, त्यांना विरोध करण्यात येईल. पक्षातील वरिष्ठ दखल घेत नसल्याने नांदेडमध्ये हाणामारीपर्यंत प्रकार जात आहेत. विधानसभा निवडणुकीमध्ये देखील नांदेड उत्तरचे तिकीट बबन थोरात यांनी विकल्याचा आरोप बंडू खेडकर यांनी केला आहे.

दरम्यान, पक्षातील अनेक ज्येष्ठ नेते,कार्यकर्ते बबन थोरात यांच्या वृत्तीमुळे पक्षातून बाहेर जात आहेत. नांदेडमध्ये उद्धव ठाकरे यांची शिवसेना टीकवायची असेल तर अशा गद्दारांना नांदेडमध्ये येऊ देणार नसल्याची भूमिका आमची राहणार असल्याचा इशारा ठाकरे सेनेचे माजी जिल्हाप्रमुख बंडू खेडकर यांनी दिला आहे.