संजय सूर्यवंशी, साम टीव्ही

नांदेड लोहा नगरपरिषदेत भाजपने उमेदवारी दिलेल्या एकाच कुटुंबातील सहा जणांना पराभवाला सामोरे जावं लागलं आहे. लोहा नगरपरिषदेत शरद पवारांच्या राष्ट्रवादी काँग्रेसने भाजपला धूळ चारत दणदणीत विजय मिळवला आहे. नगरपालिकेच्या एकूण १७ जागांवर राष्ट्रवादीच्या उमेदवारांनी विजय मिळवला आहे. राष्ट्रवादीच्या विजयाने भाजपला मोठा धक्का बसला आहे.

भाजपचे उमेदवार गजानन सूर्यवंशी यांच्यासह त्यांच्या कुटुंबातील सर्व सहा उमेदवारांचा पराभव झालाय. त्यामुळे लोह्यात भाजपला पूर्णपणे अपयश स्वीकारावे लागलं आहे. या निवडणुकीत ठाकरे गटाची शिवसेना, भाजप आणि काँग्रेसला प्रत्येकी एकच जागा मिळाली आहे. तर राष्ट्रवादीने स्पष्ट बहुमत मिळवत नगरपालिकेवर वर्चस्व प्रस्थापित केलं आहे.

नांदेड लोहा नगरपरिषदेच्या या निकालाकडे आमदार चिखलीकर यांच्यासाठी “कही खुशी कही गम” अशा नजरेने पाहिले जात आहे. एकीकडे मतदारसंघातील लोहा नगरपालिका राष्ट्रवादीकडे राखण्यात यश आलं आहे.

कंधारमध्ये पराभव पत्करावा लागल्याने मिश्र प्रतिक्रिया उमटत आहेत. निकाल जाहीर होताच राष्ट्रवादीच्या कार्यकर्त्यांनी लोहा शहरात जल्लोष करत फटाके फोडले, गुलाल उधळला आणि एकमेकांचे अभिनंदन केले.

कोणाकोणाला दिली होती उमेदवारी?

नगराध्यक्ष पदासाठी गजानन सूर्यवंशी यांना उमेदवारी देण्यात आली होती. पत्नी गोदावरी गजानन सूर्यवंशी यांना (प्रभाग ७ अ) मधून उमेदवारी देण्यात आली होती. भाऊ सचिन सुभाषराव सूर्यवंशी यांना (प्रभाग क्रमांक १ अ) मधून उमेदवारी देण्यात आली होती. भावाची पत्नी सुप्रिया सचिन सूर्यवंशी (प्रभाग ८ अ) मधून यांना पराभवाला सामोरे जावं लागलं आहे. मेव्हुणा युवराज वसंतराव वाघमारे (प्रभाग क्रमांक ७ ब) मधून उमेदवारी मिळाली होती. तर भाच्याची पत्नी रिना अमोल व्यवहारे (प्रभाग क्रमांक ३) मधून उमेदवारी देण्यात आली होती.