संजय सूर्यवंशी

नांदेड : दुपारच्या सुमारास गुरे चारण्यासाठी गेलेल्या एका तरुणावर अस्वलाने अचानक हल्ला केला. या हल्ल्यात तरुण गंभीर जखमी झाला असून त्याला रुग्णालयात उपचारासाठी दाखल करण्यात आले आहे. वन विभागाच्या अधिकाऱ्यांनी जखमींची भेट घेऊन त्याला तात्पुरती आर्थिक मदत केली आहे. 

नांदेडच्या (Nanded) किनवट तालुक्यातील मोहपूर शिंदगी शिवारात सदरची घटना घडली आहे. या घटनेत शंकर आमले (वय २५) हा तरुण जखमी झाला आहे. शंकर आमले हा तरुण सकाळी गुरे चारण्यासाठी शेत शिवारात गेला होता. गुरे चरत असल्याने शंकर हा एका ठिकाणी उभा होता. याच वेळी अस्वलाने (Bear Attack) शंकर आमले याच्यावर अचानक हल्ला केला. अस्वलाने हल्ला करत आमले यांच्या डोक्याला व डोळ्याच्या दोन्ही बाजूने जोराचा चावा घेतल्याने चेहरा देखील फाटला आहे. यामुळे आमले गंभीर जखमी झाला.  

वन विभागाची भेट 

आजूबाजूच्या परिसरात घटनेची माहिती मिळाल्यानंतर शंकर आमले या तरुणाला रुग्णालयात दाखल करण्यात आले असून त्याच्यावर उपचार सुरू आहेत. तसेच घटनेची माहिती मिळाल्यानंतर वन विभागाच्या पथकाने तात्काळ घटनास्थळी भेट देत पंचनामा केला. तसेच जखमीला तात्पुरत्या स्वरूपाची आर्थिक मदत केली आहे.