संजय सूर्यवंशी 
नांदेड : शिक्षकी पेशाला काळिमा फासणारी संतापजनक घटना नांदेड जिल्ह्यात घडली आहे. दहावीच्या वर्गात शिक्षण घेणाऱ्या अल्पवयीन विद्यार्थिनीला गड बसवून नेताना पिण्यास पाणी देताना यातून गुंगीचे औषध देऊन अत्याचार केल्याची घटना घडली आहे. या घटनेमुळे नांदेड जिल्ह्यात खळबळ उडाली आहे. या प्रकरणी शिक्षकावर गुन्हा दाखल करण्यात आला आहे. 

नांदेडच्या हदगाव तालुक्यातील तामसा येथे ही घटना घडली आहे. या घटनेत नांदेड येथील पोलीस प्रशिक्षण केंद्र दाखवण्याचा बहाणा करत अल्पवयीन विद्यार्थिनीला स्वतःच्या चारचाकी वाहनातून नेले. या दरम्यान तिला पाण्यातून गुंगीचे औषध दिले आणि तिच्यावर अत्याचार केला. इतकेच नाही तर ही बाब कुणाला सांगितल्यास जीवे मारण्याची धमकी या शिक्षकाने विद्यार्थिनीला दिली. 

विद्यार्थिनी गरोदर राहिल्याने केला गर्भपात 

दरम्यान तुझा बनवलेला व्हिडिओ व्हायरल करेल, असे सांगून शिक्षकाने वारंवार विद्यार्थिनीवर बलात्कार केला. या प्रकारातून पीडित विद्यार्थिनी गरोदर राहिली असता तिचा गर्भपात देखील करण्यात आला. दरम्यान घडलेला प्रकार कुटुंबियांना लक्षात आला. यामुळे मुलीला विश्वासात घेऊन विचारले असता पीडित मुलीने घडला प्रकार घरच्यांना सांगितला.  

शिक्षकावर गुन्हा दाखल 

ही माहिती घरच्यांना समजल्यानंतर मुलीच्या फिर्यादीवरून आरोपी शिक्षक राजूसिंह चौहान याच्यावर पोस्को अंतर्गत बलात्काराचा गुन्हा दाखल करण्यात आला आहे. दरम्यान या घटनेच्या निषेधार्थ आज तामसा शहरातील व्यापाऱ्यांनी आपापली प्रतिष्ठाने बंद ठेवत घटनेचा निषेध नोंदवला आहे. तर आरोपी शिक्षका विरोधात कठोर कारवाई करण्याची मागणी नागरिकांनी केली आहे.