संजय सूर्यवंशी
नांदेड  : लग्नानंतर काही महिन्यात नवविवाहितेची हत्या करण्यात आल्याची खळबळजनक घटना समोर आली आहे. दरम्यान हुंड्याची रक्कम न दिल्याने नवविवाहितेची हत्या करण्यात आल्याचा आरोप महिलेच्या नातेवाईकांनी केला आहे. या प्रकरणी नातेवाईकांनी केलेल्या तक्रारीवरून सासरच्या चौघांवर हुंडाबळीचा गुन्हा दाखल करण्यात आला असून पोलिसांकडून या प्रकरणी तपास केला जात आहे. 

नांदेड जिल्ह्याच्या मुखेड तालुक्यातील राठोडवाडी गावात सदरची घटना घडली आहे. या घटनेत नवविवाहित ताऊबाई राठोड हिची विष पाजवून हत्या करण्यात आल्याची धक्कादायक घटना घडली आहे. ताऊबाई हिचा काही महिन्यांपूर्वी विवाह झाला होता. विवाह जुळविताना सासरच्या मंडळींनी हुंड्याची मागणी केली होती. यात एक लाख रुपये देण्याचे ठरले होते. मात्र लग्न झाल्यानंतर हुंड्याची रक्कम ताऊबाई हिच्या माहेरच्यांकडून दिले गेले नव्हते. 

चौघांविरोधात हुंडाबळीच्या गुन्हा दाखल 

दरम्यान लग्नाच्या काही महिन्यातच ताऊबाई हिची हत्या करण्यात आली. हुंड्यात ठरलेले एक लाख रुपये न दिल्यामुळे हा प्रकार घडल्याचा आरोप मृत तरुणीच्या वडीलांनी केला आहे. या प्रकरणी पोलिसात तक्रार दिली असून पोलिसांनी सासरच्या चौघांविरुद्ध हत्या आणि हुंडाबळीचा गुन्हा दाखल केला आहे. या प्रकरणात मुखेड पोलीस पुढील तपास करत आहेत.

तुळींज पोलीस ठाण्यात दोन गटात फ्रीस्टाइल

नालासोपारा पूर्वेकडील तुळींज पोलीस ठाण्यात अंमलदार कक्षामध्ये दोन गटात फ्री स्टाईल झाल्याचे पाहण्यास मिळाले. यात तक्रार दाखल करण्यासाठी आलेल्या दोन गटात हि फ्री स्टाईल हाणामारी झाली. या हाणामारीचा व्हिडिओ सोशल मीडियावर चांगलाच वायरल होत आहे. काही वेळानंतर पोलिसांनी मध्यस्थी केली आणि दोन्ही गटाला बाजूला केले.