महेंद्र वानखेडे

नालासोपारा : नालासोपारा पूर्वेच्या भागात पालिकेच्या परिवहन सेवेच्या भंगार बसला आग लागण्याचे सत्र सुरूच आहे. दरम्यान बुधवारी सकाळी साडेअकराच्या सुमारास पुन्हा एकदा भंगार बसने अचानक पेट घेतला आहे. यापूर्वी रविवारी रात्री देखील आग लागून सहा बस जळल्या होत्या. 

नालासोपारा (Nalasopara News) पूर्वेकडील सनशाइन येथे महापालिकेने भंगार झालेल्या परिवहन सेवेच्या बस ठेवण्यात आल्या आहेत. या बस अजूनही हटविण्यात न आल्याने सातत्याने यांना आग लागण्याच्या घटना समोर येत आहेत. यातच बुधवारी पुन्हा एकदा अचानकपणे येथील एका बसला आग लागल्याने खळबळ उडाली होती. या घटनेची माहिती नागरिकांनी तात्काळ महापालिकेच्या (Fire Brigade) अग्निशमन दलाला दिली. 

आगीची माहिती मिळताच अग्निशमन दलाच्या जवानांनी घटनास्थळी पोहचून आगीवर नियंत्रण मिळवण्याचे काम सुरू केले. आगीमुळे आजूबाजूच्या परिसरात धुराचे वातावरण निर्माण झाले होते. सुदैवाने या आगीत कोणतीच जीवितहानी झाली नसून भंगार बस जळून खाक झाली आहे. अशा प्रकारामुळे येथून प्रवास करण्यास नागरिकांना अडचणी येत आहेत. 

भंगार बस पडून असल्याने धूम्रपान करण्यासाठी चरसी व गर्दुल्ले यांचा वावर वाढला आहे. या ठिकाणी आगी लागत असून त्या लावल्या जात असल्याचा आरोप भाजपचे अल्पसंख्याक जिल्हा प्रभारी मुज्जफर घनसार यांनी केला आहे. तर बस हटवा अन्यथा नवनिर्वाचित आमदार यांना सोबत घेऊन पालिकेच्या समोर आंदोलन करू असा इशारा त्यांनी दिला आहे.