नागपूरमधून धक्कादायक बातमी समोर आली आहे. युरोपमध्ये चांगल्या पगाराची नोकरी मिळवून देण्याचे स्वप्न दाखवत नागपूरच्या २८ वर्षीय महिलेची पोर्तुगालमध्ये मानवी तस्करी केल्याचा धक्कादायक प्रकार समोर आला आहे. पुण्यातील एका कन्सल्टन्सीमार्फत महिलेकडून तब्बल ११ लाख रुपये उकळले असून, याप्रकरणी पुणे विमानतळ पोलिस ठाण्यात आंतरराष्ट्रीय मानवी तस्करीचा गुन्हा दाखल करण्यात आला आहे.

महिलेच्या तक्रारीनुसार, युरोपमध्ये दरमहा सुमारे दीड लाख रुपयांच्या पगाराची नोकरी देण्याचे स्वप्न तिला दाखवण्यात आले होते. कॅशिअरची नोकरी देण्याचे सांगून तिला पोर्तुगालला पाठवण्यात आले. मात्र, तिथे पोहोचल्यानंतर तिचा पासपोर्ट काढून घेण्यात आला आणि दोन दिवस एका खोलीत डांबून ठेवण्यात आल्याचा आरोप तिने केला आहे.

त्यानंतर सुपरमार्केटमध्ये नोकरी देण्याऐवजी पोर्तुगालमधील एका बिअर शॉप मालकाला तिला विकल्याचा गंभीर आरोप महिलेने केला आहे. संबंधित व्यक्तीच्या घरी ठेवून तिचे लैंगिक शोषण करण्यात आल्याचेही तिने तक्रारीत म्हटले आहे. ‘तुला खरेदी करण्यासाठी भारतातील एजंटना पैसे दिले आहेत,’ असे त्या व्यक्तीने सांगितल्याचा महिलेचा दावा आहे.

महिनाभर नरकयातना सहन केल्यानंतर महिलेने २९ जून रोजी पोर्तुगालमधून पळ काढला. बसने लिस्बनहून माद्रिद गाठल्यानंतर दोहा मार्गे ती भारतात परतली. भारतामध्ये परतल्यानंतरही आरोपींनी माल्टामध्ये नोकरी लावून देण्याच्या नावाखाली आणखी तीन लाख रुपयांची मागणी केली आणि तिच्या पतीलाही धमकावल्याचा आरोप आहे. या प्रकरणी प्राजक्ता भाभा अनिलकुमार, अनहर शेख, वामन, टैतल्य, हिम्मतसिंग आणि कपिल यांच्याविरोधात गुन्हा दाखल करण्यात आला आहे. पुणे पोलिसांकडून या कथित आंतरराष्ट्रीय मानवी तस्करीच्या नेटवर्कचा तपास सुरू असून, तपासात आणखी धक्कादायक माहिती समोर येण्याची शक्यता आहे.