पराग ढोबळे, साम टीव्ही

नीट फेरपरीक्षेपूर्वी एनटीएच्या कारभाराचा आणखी एक गोंधळ समोर आला आहे. नागपूरच्या विद्यार्थ्याला थेट अबूधाबीतील परीक्षा केंद्राचे वाटप करण्यात आल्याचं समोर आलं आहे. २१ जून रोजी होणाऱ्या नीट फेरपरीक्षेसाठी परदेशातील केंद्र मिळाल्याने खळबळ उडाली आहे. एनटीएच्या परीक्षेला अवघा एक दिवस शिल्लक असताना सावळा गोंधळ उघडकीस आल्याने विद्यार्थी आणि पालक चिंतेत आहेत.

विद्यार्थी अब्दुल्लाहला याने याआधी नागपूरमध्येच परीक्षा केंद्र मिळाले होते. फेरपरीक्षेसाठी एनटीएने थेट यूएईमधील अबूधाबी केंद्र दिले. अर्ज करताना विद्यार्थ्याने नागपूर, वर्धा आणि भंडारा हे पर्याय निवडले होते. स्थानिक पसंतीक्रम डावलून परदेशातील केंद्र देण्यात आल्याचा आरोप आहे. नीट पेपरफुटीनंतर पारदर्शकतेचे दावे करणाऱ्या एनटीएवर प्रश्नचिन्ह निर्माण झालं आहे.

एनटीएच्या ढिसाळ नियोजनामुळे विद्यार्थ्यांचे शैक्षणिक नुकसान होण्याची भीती आहे. विद्यार्थ्याकडे पासपोर्ट नसल्याने परदेशात जाणे अशक्य असल्याची व्यथा पालकांनी मांडली. २४ ते ४८ तासांत पासपोर्ट आणि व्हिसा प्रक्रिया पूर्ण करणे शक्य नसल्याचे पालकांचे म्हणणे आहे. एनटीएच्या निष्काळजीपणामुळे विद्यार्थ्याचे शैक्षणिक वर्ष वाया जाण्याची भीती व्यक्त करण्यात आली आहे.

या अजब कारभारानंतर पालकांनी तातडीने एनटीएच्या हेल्पलाइनवर तक्रार नोंदवली. अधिकाऱ्यांनी तांत्रिक चूक झाल्याचे मान्य केल्याची माहिती आहे. पडताळणीनंतर सुधारित प्रवेशपत्र देण्याचे एनटीएकडून आश्वासन देण्यात आलं आहे. नवीन हॉलतिकीट मिळेपर्यंत विद्यार्थी आणि पालकांचा मानसिक तणाव कायम आहे. माजी शिक्षणमंत्री डॉ. अनीस अहमद यांनी एनटीएवर तीव्र नाराजी व्यक्त केली. विद्यार्थ्याला तातडीने स्थानिक परीक्षा केंद्रासह सुधारित प्रवेशपत्र देण्याची मागणी केली. परीक्षेच्या व्यवस्थापनावरून एनटीए पुन्हा एकदा वादाच्या भोवऱ्यात सापडली आहे.