पराग ढोबळे 
नागपूर : मकरसंक्रांतीचा सण आज सर्वत्र साजरा होत असताना ठिकठिकाणी पतंगोत्सव देखील साजरा केला जात आहे. या पतंगोत्सवात बंदी असलेल्या नायलॉन मांजाचा मोठ्या प्रमाणात वापर होत असून मांजामुळे होणाऱ्या दुर्घटना टाळण्यासाठी नागपूर शहरातील वेगवेगळ्या भागात असलेले १४ उड्डाणपूल आज वाहतुकीसाठी बंद करण्यात आले आहेत. या पुलावरून होणारी वाहतूक अन्यत्र वळविण्यात आली आहे. 

मकरसंक्रांतीच्या पार्श्वभूमीवर पतंगोत्सव साजरा केला जात आहे. पतंग उडविण्यासाठी वापरण्यात येत असलेल्या नायलॉन मांजामुळे अनेक दुर्घटना दरवर्षी होत असतात. यामुळे यावर बंदी घालण्यात आली आहे. तरी देखील या मांजाचा वापर व विक्री होत आहे. दरम्यान आज देखील नायलॉन मांजामुळे दुचाकीवरून जाणाऱ्या एक पोलीस कर्मचाऱ्याचा गळा कापला गेल्याने गंभीर जखमी झाल्याची घटना घडली आहे. यामुळे सुरक्षा म्हणून नागपूरमधील १४ उड्डाणपुलावरील वाहतुकीस बंदी करण्यात आली आहे. 

 या उड्डाणपुलावर राहणार बंदी 

नागपूर पोलीस प्रशासन घेतलेल्या निर्णयानुसार शहरातील सदर, बर्डी, रामविलास, सक्करदरा, दिघोरी, गोळीबार पाचपावली, कळंबे चौक ते सदर, दहीबाजार, मेहंदीबाग यासह १४ उड्डाणपूल आज वाहतुकीसाठी बंद असणार आहेत. बंद केलेल्या प्रत्येक उड्डानपुलाच्या दोन्ही बाजुंनी बॅरिकेटिंग लावण्यात आले आहेत. वाहतूक विभागाने सुरक्षेच्या पार्श्वभूमीवर हा निर्णय घेतला असून सकाळी ६ ते संध्याकाळी ६ पर्यंत उड्डाणपुलावरून वाहतूक बंद असणार आहे. त्यामुळे वाहतूक वळवण्यात आल्याचे वाहतूक विभागाच्या साह्यक पोलीस आयुक्त माधुरी बाविस्कर यांनी सांगितलं.

दुचाकींवर बांधल्या तार 

नायलॉन मांजापासून बचावासाठी दुचाकींवर तार बांधण्यात आल्या आहेत. शहरातील स्वयंसेवी संघटना आणि नागपूर वाहतूक पोलिसांकडून हा उपक्रम राबविण्यात येत आहे. अचानक समोर येणाऱ्या मांज्यापासून बचावासाठी दुचाकी सामोर हँडलवर यु आकाराचा तार बांधून बचाव केला जाऊ शकतो. या तारामुळे मांजा गळ्याला न लागता ताराला अडकून खाली पडून जातो. त्यामुळे दुखापत होण्याचा धोका टळतो. त्यामुळे मांजापासून बचावासाठी दुचाकीस्वारांनी गळ्याभोवती दुपट्टा गुंडाळण्याचे आवाहन करण्यात आले आहे.