नागपूर शहरातील मेडिकल चौक परिसरात गुरुवारी रात्री एका कुख्यात गुंडाची निर्घृण हत्या झाल्याची घटना समोर आली आहे. पलाश वासनिक असे मृत गुंडाचे नाव असून, या घटनेमुळे परिसरात खळबळ उडाली आहे. रात्री साडेदहा ते अकराच्या दरम्यान मेडिकल रुग्णालयाच्या गेटजवळ हा प्रकार घडला.

मिळालेल्या प्राथमिक माहितीनुसार, काही आरोपींनी पलाश वासनिक याच्यावर अचानक चाकूने हल्ला केला. त्याच्या शरीरावर अनेक वार करण्यात आले. एवढ्यावरच न थांबता आरोपींनी जवळच असलेल्या सिमेंटच्या कुंडीने त्याच्या डोक्यावर आणि चेहऱ्यावर जोरदार प्रहार केले. या हल्ल्यात गंभीर जखमी झालेल्या पलाशचा मृत्यू झाला. घटनेनंतर आरोपी घटनास्थळावरून पळून गेले. पलाश वासनिक हा रामबाग परिसरातील रहिवासी असून, त्याची गुन्हेगारी पार्श्वभूमी होती. त्याच्याविरुद्ध यापूर्वी अनेक गंभीर गुन्ह्यांची नोंद असल्याची माहिती आहे.

विशेष म्हणजे, दोन महिन्यांपूर्वीच एमपीडीए कायद्यांतर्गत कारवाई झाल्यानंतर तो कारागृहातून बाहेर आला होता. या हत्येमागे कौटुंबिक वाद असल्याचा प्राथमिक संशय व्यक्त केला जात आहे. पलाशचा मेव्हणा चिंटू उर्फ आयुष धुपे आणि त्याच्या साथीदारांचा या हत्येत सहभाग असल्याची चर्चा आहे. पलाशकडून बहिणीला त्रास दिला जात असल्याने मेव्हण्याने हे पाऊल उचलल्याची प्राथमिक माहिती समोर येत आहे.

घटनेची माहिती मिळताच पोलिसांचे वरिष्ठ अधिकारी तातडीने घटनास्थळी दाखल झाले. पोलिसांनी परिसरात बंदोबस्त वाढवून बॅरिकेडिंग केले. हत्येनंतर घटनास्थळी नागरिकांची मोठी गर्दी जमली होती. त्यामुळे मेडिकल चौकातील वाहतुकीवरही परिणाम झाला. मध्यरात्रीपर्यंत परिसरात तणावाचे वातावरण होते. सध्या पोलीस या प्रकरणाचा तपास करत असून, फरार आरोपींचा शोध सुरू आहे. हत्येमागचे नेमके कारण तपास पूर्ण झाल्यानंतरच स्पष्ट होणार आहे.