पराग ढोबळे 

नागपूर : गॅस कटरच्या सहाय्याने एटीएम मशीन फोडून त्यातील रक्कम लांबविल्याच्या अनेक घटना समोर आल्या आहेत. मात्र नागपूरमध्ये एटीएम मशीन न तोडता हे मशीन गाडीमध्ये टाकून चोरटे पसार झाल्याची घटना समोर आली आहे. यामध्ये सुमारे साडेसात लाख रुपयांची रक्कम असल्याची माहिती समोर आली आहे. या चोरट्यांचा तपास पोलिसांकडून करण्यात येत आहे. 

नागपूरच्या मानकापूर परिसरात पहाटे चार वाजताचा सुमारास सदरची घटना घडली आहे. मानकापूर परिसरात पंजाब नॅशनल बँकेचे एटीएम मशीन आहे. सदरचे मशीनच लांबविण्यात आले आहे. दरम्यान सकाळी परिसरातील नागरिकांच्या हा प्रकार लक्षात आला. यानंतर घटनेची माहिती पोलिसांना देण्यात आली होती. यानंतर पोलिसांनी घटनास्थळी येत सीसीटीव्ही तपासून तपासाला सुरवात केली आहे. 

चोरटे सीसीटीव्ही कॅमेरात कैद 
नागपूरच्या मानकापूर चौकातील पंजाब नॅशनल बँकेचे एटीएम मशीन चोरट्यांनी छोटा मालवाहू वाहनात टाकून पसार झाले आहेत. एटीएममध्ये सात लाख ५८ हजाराची रक्कम असल्याची माहिती पोलिसांनी दिली. तर एटीएम मशीन नेताना तीन आरोपी सीसीटीव्ही कॅमेरामध्ये कैद झाले आहेत. सीसीटीव्हीच्या माध्यमातून तपास करून मानकापूर पोलिस आरोपीचा शोध घेत आहे.

चोरट्यांची हिंमत वाढली 

गॅस कटरच्या सहाय्याने एटीएम मशीनचा पत्रा कापून त्यातील रोकड लांबविल्याच्या घटना घडल्या आहेत. मात्र नागपूर शहरात एटीएम मशीन चोरी करण्यात आले आहे. यासाठी थेट गाडी घेऊन चोरटे आले होते. अर्थात नेहमी गजबजलेल्या परिसरात हि घटना घडल्याने खळबळ उडाली असून या चोरट्याने शोधण्याचे आव्हान पोलिसांसमोर उभे आहे.