पराग ढोबळे 

नागपूर : रात्रीच्या सुमारास एटीएम मध्ये प्रवेश करून मशीनमधील रक्कम चोरी करण्याचा प्रयत्न करण्यात येत होता. मात्र रस्त्यावरून जाणाऱ्या नागरिकांच्या सदर प्रकार लक्षात आला. यावेळी चोरट्याचे हे कृत्य मोबाईलमध्ये कैद करण्यात आले असून नागरिकांनी सतर्कता दाखवत चोरट्याचा प्रयत्न हाणून पाडला आहे. यानंतर चोरट्याला पोलिसांच्या ताब्यात देण्यात आले. 

नागपूर शहरातील ऑटोमोटिव्ह चौकात असलेल्या एसबीआय बँकेच्या एटीएममधून पैसे चोरी करण्याचा प्रयत्नात असणाऱ्या एकाला कपिल नगर पोलिसांनी अटक केली. चेतन उईके असे अटक करण्यात आलेल्या आरोपीचे नाव आहे. रात्रीच्या सुमारास रस्त्यावर वर्दळ नसल्याचे पाहून चोरट्याने एटीएम मशीनच्या केबिनमध्ये प्रवेश केला. यानंतर त्याने मशिनमधून पैसे काढण्याचा प्रयत्न सुरु केला होता. दरम्यान परिसरातील नागरिकांच्या हा प्रकार लक्षात आला. 

नागरिकांनी रंगेहाथ पकडले 

सराईत आरोपीने एटीएम फोडून पैसे काढण्याचा प्रयत्न केला. पण नागरिकांच्या सतर्कतेमुळे तो प्रयत्न अयशस्वी झाला. एटीएम मधून पैसे काढत असताना नागरिकांनी त्याला रंगेहाथ पकडले. तर याबाबत पोलिसांना माहिती देण्यात आली. यानंतर पोलिसांनी लागलीच घटनास्थळी येत पैसे चोरणाऱ्यास ताब्यात घेतले आहे. 

चोरटा सराईत गुन्हेगार 
सदर आरोपी हा वर्धा जिल्ह्यातील समुद्रपूर येथील रहिवासी आहे. तो सराईत गुन्हेगार असून तो नागपुरात हिंगणा येथे आपल्या बहिणीकडे राहत होता. चोरीच्या उद्देशाने तो नागपूर शहरात आल्याची माहिती पोलीस तपासात समोर आली आहे. दरम्यान त्याचा सोबत आणखी कोणी होतं का? याचा तपास पोलीस करीत आहे. आरोपीला पकडून कपिल नगर पोलिसांच्या ताब्यात देण्यात आले.