पराग ढोबळे, साम टीव्ही

औरंगजेबाच्या कबरीवरून राजकारण तापलं आहे. औरंगजेबाच्या कबरीचा वाद थेट जाळपोळीपर्यंत पोहोचला. नागपुरातील हिंसाचार प्रकरणी काहींना ताब्यात घेण्यात आलं आहे. हिंसाचार प्रकरणातील मास्टरमाईंड फहीम खानला बेड्या ठोकण्यात आल्या आहेत. फहीम खानवर जमावाला चिथावल्याचा आरोप करण्यात येत आहे. मास्टरमाईंड फहीम खानचा दुसरा व्हिडिओ समोर आला आहे.

नागपुरात सोमवारी छत्रपती शिवाजी महाराज चौकात विश्व हिंदू परिषदेने आंदोलन केले. विश्व हिंदू परिषदेच्या आंदोलनानंतर दुसऱ्या गटाने छत्रपती शिवाजी महाराजांच्या पुतळ्याजवळ विरोधात निदर्शने सुरु केली. त्यानंतर दोन्ही गटाचा वाद उफाळून हिंसाचार झाला. दोन गटात हिंसाचार झाल्यानंतर दगडफेक झाली. या दगडफेकीत काही नागरिकांसह पोलीस कर्मचारी जखमी झाले. एका गटाने रस्त्यावरील वाहने जाळली. नागपुरात एका गटाला चिथावल्याचा आरोप फहीमवर करण्यात येत आहे.

नागपुरातील याच फहीमचा आणखी एक व्हिडिओ समोर आला आहे. या व्हिडिओमध्ये मायनॉरिटी डेमोक्रॅटिक पार्टीचा शहर अध्यक्ष हा फहीम खान हा पोलीस उपायुक्त राहुल माखणीकर यांच्याशी हुज्जत करताना दिसून येत आहे. पोलिसांनी त्याला नीट समजून सांगण्याचा प्रयत्न करत आहे. मात्र तो पोलिसांशी हूज्जत घालत होता.

नागपुरात झालेल्या हिंसेकरिता फहीम खान हाच मास्टरमाइंड असल्याचा पोलिसांना संशय आहे. सर्व व्हिडिओ , फोटो आणि व्हिडिओतील संभाषण पाहता चिथावणी देण्याचे काम फहिम खान यांनी केल्याचा पोलिसांना संशय आहे.