आगामी स्थानिक स्वराज्य संस्थांच्या निवडणुकांच्या पार्श्वभूमीवर भाजपमध्ये जोरदार इनकमिंग सुरू आहे. मुंबईतील भाजप कार्यलयात विविध पक्षातील चार नगरसेवकांनी भाजपचं कमळ हाती घेतलं आहे. भाजपचे प्रदेशाध्यक्ष रवींद्र चव्हाण यांच्या उपस्थितीत त्यांनी भाजप पक्षात प्रवेश केला आहे. यांच्यासह मनसे नेते वैभव खेडेकर यांचाही भाजप पक्षात प्रवेश झाला. तळकोकणातील बडा नेता आणि कराडमधील चार नगरसेवकांनी कमळ हाती घेतल्यामुळे भाजपची ताकद वाढली आहे.

कराडमध्ये भाजपच्या नेत्यांकडून जोरदार तयारी सुरू आहे. आगामी निवडणुकांच्या पार्श्वभूमीवर भाजप नेत्यांची लगबग सुरू आहे. भाजपकडून पक्ष वाढवण्यासाठी प्रयत्न सुरू आहे. अशातच पश्चिम महाराष्ट्रातील कराड आणि तळकोकणातील बड्या नेत्यांनी आपआपल्या पक्षाला जय महाराष्ट्र करत भाजपचं कमळ हाती घेतलं आहे.

कराडमध्ये भाजपची जोरदार इनकमिंग सुरू आहे. विविध पक्षातील चार नगरसेवकांनी भाजप पक्षात प्रवेश केला आहे. हा पक्षप्रवेश सोहळा मुंबईतील भाजप कार्यालयात पार पडला असून, प्रदेशाध्यक्ष रवींद्र चव्हाण यांच्या उपस्थितीत हा पक्ष प्रवेश कार्यक्रम पार पडला. यशवंत आघाडीतील महिला नेता स्मिता हुलवान आणि स्वाभिमानी शेतकरी संघटनेतून विधानसभा निवडणूक लढवलेले इंद्रजित गुजर यांनीही भाजप पक्षात प्रवेश केला.

वैभव खेडेकर यांचा भाजप पक्षात प्रवेश

तळकोकणातील मनसे नेते वैभव खेडेकर यांनी भाजप पक्षात प्रवेश केला आहे. तीन वेळा मुर्हूत हुकल्यानंतर त्यांचा अखेर आज पक्षप्रवेश सोहळा पार पडला. काही महिन्यांपूर्वी त्यांची पक्षातून हकालपट्टी करण्यात आली होती. नंतर त्यांनी भाजप पक्षासोबत जाण्याचा निर्णय घेतला. पक्षप्रवेश वारंवार लांबणीवर जात असल्यामुळे खेडेकरांवर टीकाही झाली. त्यानंतर त्यांना शिवसेनेकडून ऑफर मिळाली होती. मात्र, आज अखेर त्यांचा भाजप पक्षात प्रवेश झाला.