मुंबई : राज्यात अपघातांचं प्रमाण वाढत चाललं आहे. त्याचदरम्यान, आता मुंबईमध्ये एका १० वर्षीय शाळकरी विद्यार्थिनीला सिमेंट मिक्सरने चिरडल्याची दुर्दैवी घटना समोर आली आहे. या भीषण अपघातात शाळकरी विद्यार्थिनीचा जागेवरच मृत्यू झाला असून तिचा सहा वर्षाचा लहान भाऊ जखमी झाला आहे. ही दुर्दैवी घटना मुंबईच्या बीकेसी (BKC) संकुलात घडली आहे. आज बुधवारी प्लेटिना जंक्शनवर हा अपघात घडला आहे.

मुलांना ने-आण करण्याची जबाबदारी असणाऱ्या रिक्षा चालकाने दुचाकीवरून मुलांना घेऊन जाताना हा भीषण अपघात झाला आहे. मिक्सर चालकासह रिक्षा चालकाविरोधातही निष्काळजीपणाचा बीकेसी (BKC) पोलीस ठाण्यात गुन्हा दाखल करण्यात आला आहे. गंभीर जखमी झालेल्या भावावर सायन येथील लोकमान्य टिळक रुग्णालयात उपचार सुरू. उमर असं जखमी झालेल्या भावाचं नाव आहे.