स्नेहील झणके, साम टीव्ही

मुंबई : मनसेचा गुढीपाडवा मेळावा ३० तारखेला म्हणजेच येत्या रविवारी पार पडणार आहे. यासंदर्भातल्या टिझरसाठी राज ठाकरेंनी बॅनर्सवर थेट बाळासाहेबांचा फोटो वापरलाय. यावरुन उद्धव ठाकरेंनी राज ठाकरेंवर टीका केलीये पाहूया.

दस्तुरखुद्द बाळासाहेबांनीच आपला फोटो न वापरण्याची तंबी राज ठाकरेंच्या मनसेला दिली होती. आणि तेव्हा पासून राज ठाकरेंनी बाळासाहेबांचे फोटो मनसेच्या बॅनरवर वापरणं बंद केलं. परंतू गेल्या अनेक दिवसांपासून दुरावलेले २ भाऊ एकत्र येण्याची चर्चा असतांना आता राज ठाकरेंच्या गुढी पाडवा मेळाव्याच्या बॅनरवर बाळासाहेबांचा फोटो पाहून अनेकांनी आश्चर्य व्यक्त केलंय. परंतू याच बॅनरवरुन आता उद्धव ठाकरेंनी सगळ्यांनाच बाळासाहेबांच्या शिवाय पर्याय नाही असं म्हणत टोला हाणलाय.

माझ्या विठ्ठलाला बडव्यांनी घेरलं म्हणत शिवसेनेतून बाहेर पडून राज ठाकरेंनी मनसेची स्थापना केली आणि विठ्ठल विठ्ठल म्हणत मनसेच्या बॅनरवर सर्रास बाळासाहेबांचे फोटो लावले पण बाळासाहेबांनीच खडसावल्यानंतर मनसेनं बाळासाहेबांचे फोटो वापरणं बंद केलं परंतू आता जवळजवळ 18-19 वर्षांनी मनसेनं बाळासाहेबांचा फोटो वापरल्यानं आणि शिंदे ठाकरेंमध्ये बाळासाहेबांच्या फोटोच्या वापरावरुन असलेला वाद म्हणजे अजूनही मुंबईत बाळासाहेब ठाकरेंचंच निर्वावाद वर्चस्व असल्याची ग्वाही देतंय. त्यामुळे मुंबईत बाळासाहेब ठाकरे या ब्रॅण्ड शिवाय राजकारण करता येत नाही आणि त्यामुळेच सर्वांनाच शिवसेनेचा हा ढाण्या वाघ हवाय.