सचिन कदम

Mumbai-Goa Express Way : समृद्धी महामार्गावर अपघातांचे प्रमाण थांबता थांबत नाहीये. सातत्याने या महामार्गावर अपघाताच्या घटना घडत आहेत. अशात आता मुंबई-गोवा महामार्गावर भीषण अपघात झालाय. गॅस सिलींडर वाहून नेणाऱ्या ट्रकला चारचाकीने मागून जोरदार धडक दिली आहे. या अपघातात एक जण ठार तर एक जण जखमी झाला आहे. (Accident)

स्पृहा खवळे वय (वर्ष 24 रा. देवगड) ही महिला जागीच ठार झाली आहे. तर तीचा पती सुमित खवळे (वय वर्ष 28) हा जखमी झाला आहे. खवळे दांपत्य देवगडवरून मुंबईला आंबे घेऊन येत असताना मुंबई गोवा महामार्गावर पेण नजीक हमरापुर येथे पहाटेच्या सुमारास हा अपघात झाला.

गेल्या तीन दिवसांपासून महामार्गावर वाहनांची कोंडी झाल्याचे पहायाला मिळाले. मोठा वीकएन्ड मिळाल्याने अनेक नागरिक आपल्या गावी निघाले होते. त्यामुळे शनिवारी आणि सोमवारी मोठ्या वाहतूक कोंडीचा सामना करावा लागला. अशात खवळे दांपत्य देखील सुट्टी असल्याने आपल्या गावी गेले होते. देवगड येथून आपल्या मुंबईमधील नातेवाईकांसाठी त्यांनी आंबे आणले होते.

गावाहून घरी घेऊन नेत असलेला हा मेवा शेवटचा ठरेल याची कोणालाच काही कल्पना नव्हती. मुंबई-गोवा महामार्गावर (Mumbai-Goa Express Way) त्यांची कार पोहचली तेव्हा त्यांचा वाहनावरील ताबा सुटला. त्यामुळे समोर असलेल्या गॅस सिलींडरच्या गाडीवर त्यांची चार चाकी धडकली. या भीषण अपघातात खवळे यांच्या पत्नीचा जागीच मृत्यू झाला.