पालघरमधून एक धक्कादायक बातमी समोर येत आहे. भाजपचे माजी जिल्हाध्यक्ष आणि सध्या लोकसभा संघटक म्हणून कार्यरत असलेल्या नंदकुमार पाटील यांच्यावर गंभीर आरोप करण्यात आले आहे. नंदकुमार पाटील यांच्यावर विनयभंग आणि मारहाणीचा आरोप एका महिलेनं केला आहे. या प्रकरणी वाडा पोलीस ठाण्यात पाटील आणि त्यांच्या भावांवर गुन्हा दाखल करण्यात आला आहे.

जमिनीच्या वादातून वादग्रस्त घटना

मिळालेल्या माहितीनुसार, जमिनीच्या वादातून संबंधित महिलेसोबत वाद झाला. वाद टोकाला गेला. यानंतर महिलेला मारहाण करण्यात आली. मारहाण करताना महिलेला विवस्त्र केल्याचा धक्कादायक व्हिडिओही समोर आला आहे. तर, दुसऱ्या एका सीसीटीव्हीत मारहाण करताना दृश्य कैद झालं आहे. या घटनेचा सीसीटीव्ही फुटेजही सध्या व्हायरल होत आहे.

विनयभंगाचा गुन्हा दाखल

पीडित महिलेने दिलेल्या तक्रारीनुसार, नंदकुमार पाटील आणि त्यांच्या भावांनी जमिनीच्या वादातून तिच्यावर शारीरिक आणि मानसिक छळ केला. त्यामुळे विनयभंग, मारहाण, आणि गैरवर्तनाचे कलमांखाली गुन्हा नोंदवण्यात आला आहे.

पोलिसांकडून तपास सुरू

वाडा पोलीस ठाण्याचे अधिकारी या प्रकरणाचा अधिक तपास करत आहेत. सध्या सीसीटीव्ही फुटेज, व्हिडिओ आणि इतर पुरावे तपासले जात आहेत. आरोपींवर लवकरच कठोर कारवाई होणार असल्याचे पोलिसांनी सांगितले.