Mohit Kambhoj: गेल्या काही दिवसांपासून शिवसेना शिंदे गट आणि ठाकरे गट यांच्यामध्ये जोरदार आरोप प्रत्यारोप पाहायला मिळत आहे. अशातच भाजपा नेते मोहित कंबोज यांनी मोठा गौप्यस्फोट केला आहे. ठाकरे गटाचे नेते भास्कर जाधव यांनी मुख्यमंत्री एकनाथ शिंदेंना त्यांच्या गटात सामील होण्यासाठी 100 वेळा फोन केल्याचा दावा मोहित कंबोज यांनी केला आहे. या ट्विटनंतर राज्याच्या राजकारणात खळबळ माजली आहे. (Latest Marathi update)

याबाबत अधिक माहिती अशी की, भाजप नेते मोहित कंबोज यांनी एक ट्विट केले आहे, ज्यामध्ये त्यांनी भास्कर जाधव यांच्याबद्दल मोठा गौप्यस्फोट केला आहे. "भास्कर जाधव यांनी मुख्यमंत्री एकनाथ शिंदे (Eknath Shinde) यांना त्यांच्या गटात सहभागी होण्यासाठी १०० वेळा कॉल केल्याचा दावा या ट्विटमध्ये केला आहे. मात्र भास्कर जाधव यांच्यावर विश्वास नसल्याने मुख्यमंत्री एकनाथ शिंदे भास्कर जाधव गटात घेण्यास इच्छुक नसल्याचेही" या ट्विटमध्ये म्हणले आहे.

इतकेच नव्हे तर "भास्कर जाधव यांनी गुवाहाटीचे तिकीटही बुक केल्याचेही मोहित कंबोज यांनी सांगितले आहे. जाधव हे सत्य नाकारू शकतात का?" असा थेट सवाल मोहित कंबोज यांनी केला आहे. या ट्विटनंतर राजकीय मैदानात चर्चांना उधाण आले असून, ठाकरे गटाचे नेते भास्कर जाधव आता काय उत्तर देणार याकडे सर्वांचे लक्ष लागले आहे.

दरम्यान, आज सुरू झालेल्या अर्थसंकल्पीय अधिवेशनात भास्कर जाधव यांनी शिंदे गटावर जोरदार हल्लाबोल केला होता. भास्कर जाधव यांनी माझा पॉईंट ऑफ प्रोसिजर मांडू देत नाही असा आरोप करत आक्रमक भूमिका घेतली होती. ज्यानंतर उपमुख्यमंत्री देवेंद्र फडणवीस आणि भास्कर जाधव यांच्यामध्ये चांगलीच खडाजंगी पाहायला मिळाली.