बुलढाणा : गेल्या काही दिवसांपासून राज ठाकरे हे शरद पवार यांच्यावर जहरी टीका करताना पाहायला मिळत आहेत. तर,मशिदींवरील भोंग्यांच्या बाबतीतही राज ठाकरे (Raj Thackeray) यांनी आक्रमक भूमिका घेतली आहे. शरद पवारांवर (Sharad Pawar) केलेल्या टीकेमुळे आता राष्ट्रवादी काँग्रेसच्या (NCP) नेत्यांकडून राज ठाकरेंना फैलावर घेतले जात असल्याचे पाहायला मिळत आहे. बुलढाण्यात एका कार्यक्रमात बोलताना राज्याचे अन्न व औषध प्रशासन मंत्री डॉ. राजेंद्र शिंगणे यांनी राज ठाकरेंवर घणाघाती टीका केली.

हे देखील पहा :

डॉ.राजेंद्र शिंगणे (Rajendra Shingane) म्हणाले, राज ठाकरे हे उठसूट आपली विचारधारा बदलत आहेत. ते दोन वर्षाआधी काय बोलत होते हे ते विसरत आहेत. लाव रे तो व्हिडीओ म्हणत पंतप्रधानांवर टीका करणाऱ्या राज ठाकरेंनी अचानक भूमिका बदलली त्यामुळे राज ठाकरे हे भाजपचे वकीलपत्र घेऊन काम करताहेत हे काही आता लपून राहिले नाही.

मशिदींवरील भोंग्यांबाबत बोलताना डॉ.शिंगणे म्हणाले, राज ठाकरेंना मशिदींवरील भोंगे काढण्याचा अधिकार कुणी दिला आहे? हा देश डॉ. बाबासाहेब आंबेडकरांच्या संविधानावर चालतो या देशात सर्वांना आपल्या धर्माचे आचरण करण्याचा अधिकार आहे.

Edited By : Krushnarav Sathe