भरत मोहळकर, साम टीव्ही, प्रतिनिधी

केंद्र सरकारने दूध भुकटी आयातीचा निर्णयाविरोधात राज्यात तीव्र प्रतिक्रीया उमटल्या. त्यानंतर दूध उत्पादक शेतकऱ्यांनी दूधाला 40 रुपये भाव देण्याची मागणी करत शुभम आंबरे आणि संदीप दराडे या दूध उत्पादक शेतकऱ्यांनी अहमदनगर जिल्ह्यातील अकोले तालुक्यातील गणोरे गावात उपोषणाचं अस्त्र उगारलंय.

राज्यात साडेतीन लाख टन दूध भुकटी पडून असतानाच केंद्र सरकारने 10 हजार टन दूध भुकटीच्या आयातीचा निर्णय घेतलाय. त्यामुळे आधीच संकटात असलेला दुग्ध व्यवसाय आणखीच गाळात गेलाय.

आधीच 27 रुपये असलेला दर भुकटीच्या आयातीने आणखीच घसरलाय. त्यामुळे दूधाच्या उत्पन्नाचा खर्चही निघत नसल्याचे सांगत उपोषणकर्त्यांनी खर्चाची यादीच सांगितलीय.

पशूखाद्य- 3 किलो- 96 रुपये

हिरवा चारा- 25 किलो- 125 रुपये

दूध उत्पादकांची मजूरी- 100 रुपये

गायीच्या दूधाचं उत्पन्न- 250 रुपये

सरकारने अर्थसंकल्पात दूधाला प्रति लिटर 5 रुपये अनुदान जाहीर केलंय. मात्र अनुदानाची भीक नको तर दूधाला 40 रुपये प्रति लिटर हमीभाव देण्याची मागणी केलीय. त्यामुळे दूध उत्पादकांच्या मागण्यांवर फुंकर घालून कोंडी फोडणार की लोकसभेप्रमाणे सरकार तोंड पोळून घेणार? हे पाहणं महत्वाचं ठरणार आहे.