मावळ : जुना मुंबई- पुणे महामार्गावर वडगांव चौकात मालवाहू कंटेनरचा विचित्र अपघात झाला. समोरून येणाऱ्या स्कुल बसला वाचविण्याच्या प्रयत्नात कंटेनर चालकाचे नियंत्रण सुटून अपघात झाला. या अपघातात एका महिलेचा मृत्यू झाला आहे. तर कंटेनर चालक गंभीर जखमी आहे. चालकाला उपचारासाठी रुग्णालयात दाखल करण्यात आले आहे. 

वडगांव (Maval) मावळ येथे मुंबईकरून पुण्याला येत असताना कंटेनर चालकाच्या वाहनासमोर स्कुल बस आली. शाळेच्या बसला वाचवण्याच्या प्रयत्नात कंटेनर सर्व्हिस रोडवरील दुकानात घुसला. (Accident) या वेळी रस्त्यावर उभ्या असलेल्या महिलेला कंटेनरने चिरडले. यात महिलेचा जागीच मृत्यू झाला आहे. तर कंटेनर चालक देखील गंभीर जखमी झाला आहे.   

सदर अपघातात कंटेनरने बसला देखील धडक दिली. सुदैवाने शाळेच्या बसमध्ये विद्यार्थी नव्हते; त्यामुळे मोठी जीवितहानी टळली. मात्र या अपघातामुळे जुना मुंबई- पुणे महामार्गावरील वाहतूक विस्कळीत झाली. घटनास्थळी वडगांव मावळ पोलीस दाखल झाले असून वाहतूक सुरळीत करण्याचा प्रयत्न करीत असून जखमी कंटेनर चालकाला रुग्णालयात रवाना केले आहे.