मावळ : भरधाव वेगाने आलेल्या डंपरचे दुचाकीला जोरदार धडक देत तरुणाला चिरडल्याची घटना घडली आहे. यात तरुणाचा जागीच मृत्यू झाला. या अपघातानंतर संतप्त जमावाने महामार्गावर रास्ता रोको आंदोलन करत महामार्ग रोखून धरला होता. दरम्यान पोलिसांनी मध्यस्थी करत आंदोलनकर्त्या नागरिकांची समजूत काढत महामार्ग मोकळा केला होता. 

मुंबई- बेंगलोर नॅशनल हायवेवर भुयारी मार्गाच्या कामासाठी रस्ता बंद करण्यात आलेला आहे. त्याला पर्यायी रस्ता म्हणून डि मार्ट जवळील अनेक सोसायटी समोरली सर्विस रस्ता अवजड वाहनांना खुला करून देण्यात आलेला आहे. अशातच हा रस्ता अपघाती व जीवघेणा ठरत आहे. याची प्रचिती पुन्हा एकदा आली असून आज दुपारच्या सुमारास झालेल्या अपघातात एका तरुणाचा बळी गेला आहे. 

मागून धडक देत उडविले 

दरम्यान मागील दोन दिवसापासून या रस्त्यावर छोट्या मोठ्या अपघाताची मालिका सुरू झाली आहे. यातच दुपारच्या सुमारास दुचाकी वाहनावरून दीपक साही शिंदे (वय २८) हा पेट्रोल पंपाच्या दिशेने जात असताना साई द्वारका सोसायटी समोरील सर्विस रस्त्यावर मागून येणाऱ्या भरधाव डंपरने दुचाकीला जोरदार धडक दिली. यामुळे दीपक हा खाली पडला असता डंपर त्याच्या अंगावरून गेल्याने दिपकचा जागीच मृत्यू झाला. 

संतप्त जमावाचा रास्तारोको 

अपघात घडल्यानंतर परिसरातील नागरिकांनी धाव घेतली. यानंतर संतप्त झालेल्या नागरिकांनी मुंबई- बेंगलोर महामार्ग काही काळ रोखून धरला होता. काही वेळाने पोलीस आल्यानंतर नागरिकांची समजूत काढत महामार्ग मोकळा केला. यानंतर मृतदेह यशवंतराव चव्हाण स्मृति रुग्णालय पिंपरी येथे श्रवविच्छेदनासाठी पाठवण्यात आलेला आहे. अधिक तपास देहूरोड पोलीस करीत आहे.