Massajog sarpanch by election result Beed district 2026 : बीडमधील मस्साजोग येथील सरपंचपदाच्या पोटनिवडणुकीत दिवंगत सरपंच संतोष देशमुख यांच्या पत्नी अश्विनी देशमुख यांचा पराभव झाला आहे. स्वरूपानंद देशमुख यांचा ९२ मतांनी विजय झाला आहे. बीडमधील मस्साजोग सरपंचपदाच्या पोट निवडणूक चुरशीची लढत झाली. यामध्ये अश्विनी देशमुख यांचा पराभव झाला. आता मस्साजोगचे नवीन सरपंच स्वरूपानंद देशमुख असतील.

बीडमधील केज तहसील कार्यालयात मस्साजोगच्या पोट निवडणुकीची मतमोजणी प्रक्रिया पार पडली. या प्रक्रियेसाठी ३ टेबलांची व्यवस्था करण्यात आली होती. मंगळवारी झालेल्या मतदानात एकूण २०८० मतदारांपैकी १७४४ मतदारांनी आपला हक्क बजावला होता. त्यामुळे गावात एकूण ८४ टक्के मतदान झाले आहे.

मस्साजोग सरपंचपदाच्या निवडणुकीत अश्विनी संतोष देशमुख यांचा पराभव झाला असून स्वरुपानंद देशमुख विजयी झाले आहेत. स्वरुपानंद देशमुख यांचा ९२ मतांनी विजय झाला. या विजयानंतर गावात गुलाल उधळण्यात आला आणि ढोल-ताशांच्या गजरात जल्लोष साजरा करण्यात आला. स्वरूपानंद यांना खांद्यावर घेत कार्यकर्त्यांनी जल्लोष केला. या पोटनिवडणुकीत ८४ टक्के विक्रमी मतदान झाले होते, त्यामुळे मतदारांमधील उत्सुकता दिसून आली होती. निकालानंतर अश्विनी संतोष देशमुख यांना मोठा धक्का बसलाय.

माजी सरपंच संतोष देशमुख यांच्या हत्येनंतर रिक्त झालेल्या जागेसाठी पोट निवडणूक घेण्यात आली होती. ही सरपंचपदाची निवडणूक बीड जिल्ह्यात अत्यंत भावनिक आणि राजकीयदृष्ट्या महत्त्वाची मानली जात होती. संतोष देशमुख यांच्या पत्नी अश्विनी देशमुख यांनी अर्ज भरल्यामुळे ही निवडणूक एकतर्फी होईल, असा अंदाज वर्तवण्यात येत होता. पण स्वरूपानंद देशमुख यांच्या बाजूने मतदारांनी कौल देत सर्वांनाच धक्का दिला.