Manoj Jarange Sabha in Beed :

मराठा आरक्षणासाठी मनोज जरांगे पाटील यांनी आरपारची लढाई सुरू केली आहे. सरकारला त्यांनी २४ डिसेंबरपर्यंत अल्टिमेटम दिला आहे. ही मुदत संपत आहे. त्याच्या आदल्या दिवशीच म्हणजे २३ डिसेंबरला बीडमध्ये त्यांची 'निर्णायक इशारा सभा' होणार आहे. या सभेत ते काय बोलणार? मराठा आरक्षणासाठी सुरू केलेल्या आंदोलनाची पुढील दिशा काय असेल, हे स्पष्ट होईल.

  ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

बीड (Beed News) शहरालगत असणाऱ्या छत्रपती संभाजी महाराज चौक परिसरात ही जाहीर सभा होत आहे. सकल मराठा समाज आणि समाज बांधवांकडून (Maratha aarakshan) सभेची जय्यत तयारी सुरू आहे. या सभेसाठी मोठं मैदान तयार करण्यात आलं आहे.

स्टेजची देखील उभारणी करण्यात येत आहे. त्याचबरोबर येणाऱ्या मराठा (Maratha Reservation) बांधवांची गैरसोय होऊ नये, यासाठी मैदानावर स्वच्छता केली जात आहे. २४ तारखेची सरकारला दिलेली मुदत संपण्याच्या आदल्या दिवशी ही सभा होत आहे. या सभेत मनोज जरांगे पाटील (manoj Jarange patil) काय बोलणार? याकडे सर्वांचे लक्ष लागले आहे.

ट्रॅक्टरचालकांना नोटिसा

मराठा आरक्षणासाठी मनोज जरांगेंनी सरकारला दिलेला अल्टिमेटम संपणार आहे. २४ डिसेंबरपर्यंत आरक्षण न दिल्यास मुंबईत मोर्चा धडकेल असा इशारा जरांगेंनी दिलाय. या इशाऱ्यानंतर प्रशासनानं सावध पावलं उचलली असल्याचं दिसतंय.

नांदेड जिल्ह्यातील कंधार पोलिसांनी ट्रॅक्टरचालकांना नोटीसा बजावल्या आहेत. मराठा नेते, कार्यकर्ते ट्रॅक्टरसाठी आले तर ते देऊ नयेत. तसेच सोबत ट्रॅक्टरही घेऊन जाऊ नये, असं या नोटिसांत म्हटलं आहे.

मराठा आरक्षणासाठी विशेष अधिवेशनाची गरज नाही - मनोज जरांगे

मराठा आरक्षणासाठी विशेष अधिवेशन घेण्याची गरज नाही. राहिला प्रश्न निवडणुकीचा, तर मराठा आरक्षणाचा प्रश्न सुटेपर्यंत सरकार निवडणुका घेणार नाही, असे मनोज जरांगे पाटील म्हणाले. शेवटच्या श्वासापर्यंत मी आरक्षणाची लढाई लढणार, असा निर्धारही त्यांनी व्यक्त केला.