मराठा आंदोलक मनोज जरांगे पाटील यांच्या हत्येचा कट उधळून लावण्यात आला होता. हत्येचा कट आखण्याप्रकरणी बीडमधून दोन जणांना अटक करण्यात आलीय. तर मनोज जरांगे पाटील यांनी हत्येचा कट आखण्यात राष्ट्रवादीचे नेते धनंजय मुंडे यांचा सहभाग असल्याचा आरोप केला होता. जरांगेंच्या जीवाला धोका असल्यानं त्यांना सरकारकडून संरक्षण देण्यात येत आहे. मात्र मनोज जरांगे पाटील यांनी संरक्षण घेण्यास नकार दिलाय. विशेष म्हणजे जरांगे यांनी अर्ज देऊन पोलीस संरक्षण काढून घेण्यास सांगितलंय.

"माझ्या घातपाताचा कट रचणाऱ्या मुख्य सूत्रधारालाच सरकार चौकशीपासून आणि अटकेपासून वाचवत असेन, तर मला अशा सरकारचे पोलीस संरक्षण नको! अशा अत्यंत कठोर शब्दांत मराठा आंदोलनाचे नेते मनोज जरांगे पाटील यांनी संरक्षण घेण्यास नकार दिलाय. त्याचबरोबर त्यांनी मुख्यमंत्री देवेंद्र फडणवीस यांच्यावर थेट निशाणा साधलाय. जरांगे यांनी बुधवारी दि. १९ नोव्हेंबर रोजी जालना पोलीस अधीक्षकांकडे अर्ज देत आपले पोलीस संरक्षण तात्काळ काढण्याची मागणी केली.

पोलीस अधीक्षकांना दिलेल्या अर्जात मनोज जरांगे पाटील यांनी अत्यंत गंभीर आरोप केलाय. "माझ्या घातपाताचा कट रचणारा धनंजय मुंडेच आहे. या कटाच्या मुख्य सूत्रधाराला सरकार चौकशीपासून आणि अटकेपासून वाचवत आहे." "मुख्यमंत्री आणि उपमुख्यमंत्री धनंजय मुंडे यांना पूर्ण ताकतीने वाचवण्याचा प्रयत्न करताहेत.

त्यामुळे मला दिलेलं पोलीस संरक्षण नको, ते तात्काळ काढावं." असं जरांगे यांनी आपल्या अर्जात म्हटलंय. दरम्यान जरांगे पाटील यांनी आमदार धनंजय मुंडे यांच्यावर आपला घातपात करण्याचा कट रचल्याचा गंभीर आरोप केला होता. या आरोपांवर जरांगे अजूनही ठाम आहेत.