भरत मोहोळकर, साम टीव्ही प्रतिनिधी

मराठा आंदोलकांनी उद्धव ठाकरेंचं निवासस्थान मातोश्रीबाहेर आंदोलन केल्यानंतर आता मनोज जरांगे आणखीआक्रमक झालेत. मातोश्रीबाहेरील आंदोलनासाठी थेट भाजपच्या प्रवीण दरेकरांना जबाबदार धरत त्यांनीच 13 संघटनांना एकत्र केल्याचा आरोप जरांगेंनी केलाय. दरेकरांनी कुठं बैठका घेतल्या? त्याचा तपशीलच दोन दिवसात जाहीर करणार असल्याचा इशारा जरांगेंनी दिलाय..

गेल्या काही दिवसांपासून मनोज जरांगेंनी आपला मोर्चा भुजबळांवरून दरेकरांकडे वळवलाय. भाजपला मराठ्यांची धास्ती असल्यानेच त्यांनी नाराज संघटनांना सोबत घेतलंय. या माध्यमातून मराठा आंदोलन बदनाम करायचं षडयंत्र दरेकरांनी रचल्याचाआरोप जरांगेंनी केलाय.

या संघटनांसंदर्भातील माहिती आपल्याकडे आल्याचंही जरांगेंनी म्हटलंय. तर जरांगेंनी फडणवीसांवर केलेल्या टीकेनंतर फडणवीसांचा मत्सर असलेले लोक त्यांच्याविरोधात बोलत असल्याचा टोला दरेकरांनी लगावलाय.

फडणवीस आणि दरेकर हे मराठ्यांना अंगावर घेत असल्याचं जरांगेंनी म्हटलंय. बंद दाराआड काय झालं ते उघड करणार असल्यचाही इशाराही त्यांनी दिलाय. त्यामुळे जरांगे नेमका कोणता गौप्यस्फोट करणार? आणि त्यातून भाजप आणि दरेकर कसा मार्ग काढणार? हे पाहणं महत्वाचं ठरणार आहे.