संजय सूर्यवंशी, साम टीव्ही, प्रतिनिधी

Nanded : मराठा आरक्षणाच्या मुद्द्यावरुन मनोज जरांगे पाटील आक्रमक झाले आहेत. २९ ऑगस्ट रोजी मनोज जरांगे यांनी मराठा समाजाला मुंबईत दाखल होण्याचे आवाहन केले आहे. हा मोर्चा मुंबईत आल्यानंतर काहीही झाले तरीही आम्ही मागे हटणार नाही, असे जरांगे पाटील यांनी म्हटले आहे. मोर्चाची तयारी सुरु असताना अचानक मनोज जरांगे पाटलांचा प्रकृती बिघडली आहे. त्यांना रुग्णालयामध्ये दाखल करण्यात आले आहे.

मनोज जरांगे पाटील सध्या नांदेड दौऱ्यावर आहे. २९ ऑगस्टसाठीच्या मराठा आंदोलन मोर्चासाठी त्यांनी मोर्चेबांधणी करायला सुरुवात केली आहे. यादरम्यान नांदेडमध्ये मनोज जरांग पाटील यांना चक्कर आली. सकाळपासून नांदेडमध्ये मराठा समाजाची जरांगे पाटील यांनी बैठक घेतली होती. चक्कर आल्यानंतर त्यांना नांदेडच्या विश्रामगृहात दाखल करण्यात आले. शासकीय रुग्णालयातील डॉक्टरांची टीम त्यांची तपासणी करत आहे.

एका बाजूला मनोज जरांगे पाटील यांची प्रकृती खालावली असताना, दुसऱ्या बाजूला त्यांच्या बैठकीत चोरट्यांचा धुमाकूळ घातल्याचे पाहायला मिळाले. नांदेड जिल्ह्याभरातून आलेल्या मराठा बांधवांचे चोरट्यांनी पाकीट पळवले. चोरी करताना एक चोरटा मराठा बांधवांच्या हाती लागला. चोराला जमावाने चोप देत वेळीच चोरट्याला पोलिसांच्या ताब्यात दिले. अनेकांच्या खिशातील पाकीट आणि पैसे चोरल्याच्या तक्रारी आल्याचे म्हटले जात आहे.

२९ ऑगस्ट रोजी मनोज जरांगे पाटील हे मुंबईत आंदोलन करणार आहेत. त्यांनी सकल मराठा समाजाला मुंबईत येण्याचे आवाहन केले आहे. मराठा समाजाला आरक्षण मिळावे यासाठी जरांगे पाटील आक्रमक झाल्याचे पाहायला मिळत आहे. ऐन गणेशात्सवाच्या वेळी जरांगे पाटील मुंबईत आल्याने कायदा-सुव्यस्थेवर ताण येईल असे म्हटले जात आहे. यासाठी प्रशासनाकडून नियोजन करायला सुरुवात झाली आहे.