Manikrao Kokate News: क्रीडामंत्री माणिकराव कोकाटेंच्या अटकेचे आदेश निघाल्यानं मंत्रिपदासह आमदारकीवर टांगती तलवार आहे. त्यापार्श्वभुमीवर कोकाटेंच्या राजीनाम्यापुर्वीच धनंजय मुंडेंनी थेट दिल्ली गाठत मंत्रिपदासाठी भाजपच्या वरीष्ठांकडे फिल्डिंग लावायला सुरुवात केलीय. धनंजय मुंडेंनी दिल्ली दौऱ्यात केंद्रीय गृहमंत्री अमित शाहांची भेट घेतली आहे. याच भेटीत धनंजय मुंडेंनी मंत्रिपदासाठी फिल्डिंग लावल्याची चर्चा आता रंगली आहे.

खरंतर सरपंच संतोष देशमुख हत्या प्रकरणी वाल्मिक कराडचं नाव आल्यानंतर धनंजय मुंडेंनी राजीनामा दिला. एवढंच नाही तर ऑफिस ऑफ प्रॉफिटसह कृषी घोटाळा, जिल्हा नियोजन विभागाच्या निधीचा घोटाळा, असे अनेक गंभीर आरोपांमुळे मुंडे अडचणीत आले होते. यानंतर मुंडेंनी मंत्रिपदाचा राजीनामा दिला आणि ते विजनवासात गेले.

मात्र गेल्या काही महिन्यात मुंडे पुन्हा एकदा राजकारणात सक्रीय झालेत.एवढंच नाही तर विधीमंडळात रमी खेळल्याप्रकरणी कोकाटेंच्या मंत्रिपदावर टांगती तलवार आहे. ऐन महापालिका निवडणुकीच्या तोंडावर कोकाटेंच्या रुपाने अजित पवारांच्या राष्ट्रवादीला धक्का बसलाय. मात्र संकटात संधी शोधत मुंडेंनी दिल्लीत धडक दिलीय.

आता मुंडेंचा दिल्ली दौरा पुर्वनियोजित होता की मंत्रिपदासाठी त्यांनी लॉबिंग सुरु केलंय. याचीच चर्चा रंगलीय त्यामुळे कोकाटेंचं मंत्रिपद गेल्यास धनंजय मुंडेंच्या गळ्यात मंत्रिपदाची माळ पडणार की मुंडेंना डावलून नव्या नेत्याला संधी मिळणार? याकडे राज्याचं लक्ष लागलंय.