सागर निकवाडे

Nandurbar News : नंदूरबार येथील सातपुडा पर्वतरांगांमध्ये एक व्यक्ती अडकल्याची घटना समोर आली आहे. खोल दरीत हा व्यक्ती अडकला आहे. त्याला रेस्क्यू करण्यासाठी पथकाला पाचारण करण्यात आलं आहे.

नंदूरबार जिल्ह्यातील सातपुडा पर्वत रांगेतील अतिदुर्गम भाग असलेल्या गेंदा माळ परिसरात एक 40 वर्षीय अज्ञात व्यक्ती दरी अडकल्याची माहिती आहे. धडगाव तालुक्यातील गेंदा माळ या ठिकाणी 80 फूट खोल दरीतून वाचवा वाचवा असा आवाज येत असल्याचे स्थानिक नागरिकांच्या निदर्शनास आलं. (Latest Marathi News)

कोणीतरी दरीत अडकलं असल्याचं गावकऱ्यांना दिसून आलं. गावकऱ्यांनी लगेचच धडगाव पोलीस आणि वन विभागाला याची माहिती दिली. धडगाव पोलिस आणि वन विभागाच्या टीमने या व्यक्तीला दोरीच्या साहायाने वर ओढण्याचा प्रयत्न केला, पण तो निष्फळ ठरला आहे.

रेस्क्यू करण्यात पोलिसांना अपयश आल्याने आता धुळे येथील एनडीआरएफच्या टीमला रेस्क्यू करण्यासाठी बोलवण्यात आले आहे. आज सकाळी एनडीआरएफ टीमच्या सहायाने दरीत अडकलेला व्यक्तीला रेस्क्यू करण्यात येणार आहे. मात्र दरीत अडकलेला व्यक्तीची अद्यापही ओळख पटलेली नाही.