पराग ढोबळे, साम टीव्ही

नागपुरातून धक्कादायक घटना समोर आली आहे. नागपुरात वेगळ्या राहणाऱ्या पत्नीने मुलीचा ताबा मागितला. त्यानंतर रागाच्या भरात नवऱ्याने ८ वर्षांच्या मुलीचा खून केल्याची धक्कादायक घटना समोर आली आहे. नागपुरातील वाठोड्यातील सरोदेनगर परिसरात बुधवारी पहाटे खळबळजनक घटना उघडकीस आली आहे. या घटनेने परिसरात खळबळ उडाली आहे. पोलिसांनी या प्रकरणी कारवाईला सुरुवात केली आहे.

मिळालेल्या माहितीनुसार, नराधम शेखरला त्याच्या ८ वर्षीय मुलीने बुधवारी पहाटने साडेपाचच्या सुमारास पाणी प्यायला मागितलं. त्यानंतर दारूच्या नशेत असलेल्या शेखरने रागाच्या भरात मुलीच्या छातीत चाकू खुपसला. धनश्री शेंदरे असं मृत मुलीचं नाव आहे.

धनश्री ही नागपूरच्या वाठोड्यातील सरोदेनगर भागात आजी आणि वडिलांसोबत राहत होती. शेखरचा पत्नी शुभांगीसोबत मुलीच्या ताब्यावरून दीर्घकाळ वाद सुरू होता. पत्नी ही मुलीला आईकडे देण्याच्या मागणीवर ठाम होती. त्याला शेखरचा तीव्र विरोध होता.

बायकोच्या मागणीने रागाच्या भरात शेखरने मुलीच्या छातीत चाकू खुपसला. त्यानंतर रक्ताच्या थारोळ्यात पडलेली धनश्री मदतीसाठी रडत होती. यानंतर आजी आणि काकांनी तातडीने पोलीस ठाणे गाठले. त्यानंतर मुलीला मेडिकल हॉस्पिटलमध्ये दाखल केले.

डॉक्टरांनी आठ वर्षीय धनश्रीला मृत घोषित केले. कुसुमबाई शेंदरे यांच्या तक्रारीवरून वाठोडा पोलीस ठाण्यात गुन्हा दाखल करण्यात आला. आरोपी शेखर शेंदरेला पोलिसांनी अटक केली आहे. आरोपी दारूच्या आहारी, पत्नीवर संशय आणि मारहाण करत होता. पत्नी वेगळी राहत होती. पत्नी मुलीला भेटण्यासाठी लपून यायची. मुलीची आईकडे जाण्याची ओढ आरोपीसाठी वादाचे कारण ठरले. या घटनेने संपूर्ण परिसरात संताप आणि हळहळ व्यक्त केली जात आहे.