फैयाज शेख, साम टीव्ही, प्रतिनिधी

Malshej Ghat Accident News : माळशेज घाटात भीषण अपघात झाल्याची माहिती समोर आली आहे. माळशेज घाटामध्ये फिरण्यासाठी आलेल्या पर्यटकाच्या कारने स्थानिक तरुणाच्या दुचाकीला जोरदार धडक मारली. या अपघातात एकाचा जागीच मृत्यू झाला, तर इतर दोनजण गंभीर जखमी झाल्याची माहिती समोर आली आहे.

वींकेड असल्याने अनेकजण फेरफटका मारण्यासाठी घराबाहेर पडत असतात. त्यातही पावसाळ्यात याचे प्रमाण अधिक असते. माळशेज घाटामध्येही अनेकजण फिरण्यासाठी येतात. अशाच एका पर्यटकांच्या कारने मुरबाड तालुक्याच्या अवले गावातील तरुणाच्या दुचाकीला जोरदार धडक दिली. यात एका व्यक्तीचा जागीच मृत्यू झाला.

माळशेज घाटामध्ये झालेल्या भीषण अपघाताची माहिती अवले गावातील ग्रामस्थांना मिळाली. त्यानंतर गावातील गावकऱ्यांनी मुरबाड-माळशेज महामार्ग रोखून धरला. ज्या पर्यटकाच्या कारने दुचाकीला धडक मारली, त्या पर्यटकांना आमच्या स्वाधीन करा अशी मागणी गावकऱ्यांनी केली आहे. यासाठी त्यांना महामार्गावर गर्दी केली.

ज्या पर्यटकांना स्वाधीन करण्याची गावकऱ्यांनी मागणी केली आहे, त्यांना पोलिसांनी ताब्यात घेतले आहे. या प्रकरणावरुन अवले गावातील ग्रामस्थ आणि पोलिसांमध्ये मोठा राडा पाहायला मिळाला. संतप्त गावकऱ्यांनी मुरबाड-माळशेज महामार्ग रोखून धरल्याने महामार्गावर मोठ्या प्रमाणात वाहतूक कोंडी निर्माण झाली होती.