सचिन कदम, रायगड प्रतिनिधी

Manojkumar Shinde joins NCP in Raigad : राष्ट्रवादी काँग्रेसचे खासदार सुनील तटकरे यांनी आपल्या वाढदिवसाचे औचित्य साधत रायगडच्या राजकारणात एक मोठी घडामोड घडवून आणली आहे. तटकरे यांनी महायुतीतील मित्रपक्ष असलेल्या शिवसेनेला (शिंदे गट) जोरदार धक्का दिला आहे. शिंदेंच्या शिवसेनेचे माजी रोहा तालुकाप्रमुख मनोजकुमार शिंदे यांनी आज शेकडो सहकाऱ्यांसह राष्ट्रवादी काँग्रेसमध्ये जाहीर प्रवेश केला. खासदार सुनील तटकरे आणि मनोजकुमार शिंदे हे आजवरचे कट्टर राजकीय विरोधक मानले जात असल्याने, या पक्षप्रवेशाने रायगडच्या राजकीय वर्तुळात अनेकांच्या भुवया उंचावल्या आहेत.

नेमकी नाराजी कशामुळे होती?

जिल्हा परिषद निवडणुकीनंतर मनोजकुमार शिंदे यांना अचानक शिवसेना तालुकाप्रमुख पदाचा राजीनामा द्यावा लागला होता. पक्षनेतृत्वाच्या या निर्णयानंतर शिंदे आणि त्यांचे समर्थक कमालीचे नाराज होते. गेल्या काही काळापासून ते पक्षात सक्रिय नव्हते आणि त्यांच्या पुढील भूमिकेकडे संपूर्ण तालुक्याचे लक्ष लागले होते. अखेर आज खासदार तटकरे यांच्या वाढदिवसाचा मुहूर्त साधत त्यांनी राष्ट्रवादीची घड्याळ हातावर बांधली.

रोह्यातील राजकीय समीकरणे बदलणार!

मनोजकुमार शिंदे हे रोहा तालुक्यातील एक ताकदवान नेते म्हणून ओळखले जातात. सुनील तटकरे यांचे कट्टर विरोधक अशीच त्यांची आजवरची ओळख होती. मात्र, आता हे दोन मोठे नेते एकत्र आल्यामुळे रोहा आणि पर्यायाने संपूर्ण रायगड जिल्ह्यातील राजकीय समीकरणे पूर्णपणे बदलण्याची शक्यता निर्माण झाली आहे.