Solapur fake disability certificate scam : सोलापूर शासकीय रुग्णालयातील बनावट दिव्यांग (अपंगत्व) प्रमाणपत्र घोटाळा प्रकरणात अत्यंत धक्कादायक माहिती समोर आली आहे. या प्रकरणाची व्याप्ती आता अधिकच वाढली आहे. आंतरजिल्हा रॅकेटचा पर्दाफाश करत सोलापूर शहर गुन्हे शाखेने थेट शासकीय रुग्णालयाच्या निवासी वैद्यकीय अधिकाऱ्यासह (RMO) आठ जणांना अटक केली आहे.

सोलापूर, अहिल्यानगर आणि नाशिक या जिल्ह्यांपर्यंत या घोटाळ्याचे थेट कनेक्शन पसरल्याचे धक्कादायक वास्तव समोर आले आहे. एक सेल्समन एजंट हा या संपूर्ण प्रकरणाचा मास्टरमाइंड असल्याचे तपासातून उघड झालेय. सरकारी नोकरी नियमित करण्यासाठी काही कर्मचाऱ्यांनी बनावट आधार कार्डच्या आधारे अपंगत्व प्रमाणपत्रे लाटल्याचा आरोप आहे. सामाजिक संघटनेच्या तक्रारीनंतर स्थापन केलेल्या चौकशी समितीच्या अहवालानुसार शहर पोलिसांत फिर्याद नोंदवण्यात आली होती. त्यानंतर आता धागेदोरे ३ जिल्ह्यांपर्यंत पोहचेल आहेत. या प्रकरणात पोलिसांनी थेट सरकारी डॉक्टरालाच बेड्या ठोकल्या आहेत.

निवासी वैद्यकीय अधिकारी डॉ. सतीश कनाके, राजेश भाऊसाहेब जाधव, महेश दिनकर बारगजे, राजेश रमाकांत ढवण, विजय बाळासाहेब गर्जे, अरुण रामदास शिंपी, वसीम शौकत खान, सागर गोविंद रजपूत असे अटक केलेल्या ८ आरोपींची नावे आहेत. मागील दीड वर्षाच्या कालावधीत वितरित झालेल्या आठ प्रमाणपत्र पोलिसांच्या रडारवर होती. तज्ञांची तपासणी न करता प्रमाणपत्र वितरित केल्याचं पोलीस तपासात निष्पन्न झाले आहे.

दिव्यांग प्रमाणपत्रासाठी शासकीय रुग्णालयाच्या अधिष्ठाता यांचा ओटीपी लागतो. तो ओटीपीसाठी डॉ. कणके यांनी फोन करून मिळवला. त्यानंतर प्रमाणपत्र काढण्यात आल्याची माहिती समोर आली आहे. सोलापूर पोलीस आयुक्त एम राजकुमार यांनी याची माहिती दिली आहे. ते या प्रकरणाचा तपास करत असून यात आणखी किती दूर धागेदोरे जातात, हे काही दिवसांतच स्पष्ट होईल. या घोटाळ्यामुळे सोलापूर आणि राज्यात एकच खळबळ उडाली आहे.