अहिल्यानगरमधील कर्जत तालुक्यातील चिंचोली काळदात फाटा चौक येथे जमावबंदी आदेशाचा भंग करून 'रस्ता रोको' आंदोलन केल्याप्रकरणी आमदार संग्राम जगताप यांच्यासह अनेक प्रमुख कार्यकर्त्यांवर मिरजगाव पोलीस ठाण्यात गुन्हा दाखल करण्यात आला आहे. छत्रपती शिवाजी महाराज यांच्या प्रतिमेची काही अज्ञातांनी विटंबना केली होती. या घटनेच्या निषेधार्थ आणि संबंधित आरोपींना तत्काळ अटक करण्यात यावी, या मागणीसाठी चिंचोली काळदात फाटा चौक येथे हे रस्ता रोको आंदोलन करण्यात आले होते.

जिल्हादंडाधिकाऱ्यांच्या मनाई आदेशाचा भंग करत आंदोलकांनी श्रीगोंदा ते जामखेड आणि कर्जत ते मिरजगाव या मार्गांवरील वाहतूक रोखून धरली होती, ज्यामुळे प्रवाशांची मोठी गैरसोय झाली. या प्रकरणी पोलीस कर्मचारी बळीराम गोपीनाथ काकडे यांनी मिरजगाव पोलीस ठाण्यात सरकारतर्फे फिर्याद दिली आहे.

त्यांच्या फिर्यादीवरून आमदार संग्राम जगताप, धवलसिंह मोहिते, ॲड. आकाश हाळनवर, शुभम माने, चंदनसिंग परदेशी, नितीन तोरडमल, वैभव काळदाते, सावन शेटे, उदयसिंग परदेशी, दीपक गांगर्डे, विठ्ठलसिंह शेडगे, रघुआबा काळदाते, धनंजय बांदल, बाळासाहेब निंबोरे, राहुल मते, प्रसाद कानगुडे, बालाजी लाळगे, सुनील यादव आणि ऋषीकेश काळदाते यांच्यासह इतर १०० ते १५० जणांवर गुन्हा नोंदवण्यात आला आहे.

घटनेची माहिती मिळताच उपविभागीय पोलीस अधिकारी सुजितकुमार क्षीरसागर, पोलीस निरीक्षक हनुमंत गायकवाड आणि सहाय्यक पोलीस निरीक्षक झंझाड यांनी घटनास्थळी भेट देऊन पाहणी केली. या प्रकरणाचा पुढील तपास पोलीस उपनिरीक्षक किरण जगदाळे करत आहेत.