उन्हाळा सुरू झाला असून तापमानात वाढ होत चालली आहे. राज्यातील कमाल आणि किमान तापमानाचा पारा मार्च महिन्यामध्ये सरासरीपेक्षा अधिक राहण्याची शक्यता आहे. यंदाच उन्हाळा तापदायक ठरण्याची शक्यता आहे कारण मार्चमध्ये तीव्र उष्ण लाटांची शक्यता आहे. त्यामुळे नागरिकांच्या अंगाची लाही-लाही होण्याची शक्यता आहे. तीव्र उष्ण लाटांसोबत राज्यात पावसाचा देखील अंदाज हवामान खात्याने वर्तवला आहे.

हवामान खात्याकडून दिलेल्या माहितीनुसार, मार्च महिन्यात राज्याच्या बहुतांश भागात कमाल तापमान सरासरीच्या वर राहण्याची शक्यता अधिक आहे. परिणामी, मार्च महिन्यातच उन्हाच्या झळा आणखी वाढणार असून ९ ते १५ दिवसांपर्यंत टिकून राहणाऱ्या उष्णतेच्या तीव्र लाटा येण्याची शक्यता आहे. मार्च महिन्यात कोकण, मध्य महाराष्ट्र, मराठवाड्याच्या दक्षिण भागात सरासरी ते सरासरीपेक्षा अधिक पावसाची शक्यता असल्याचे हवामान खात्याने सांगितले.

१९०१ पासूनच्या नोंदीनुसार फेब्रुवारी महिन्यात किमान तापमानाचा पारा आतापर्यंत सर्वोच्च पातळीवर होता. कमाल तापमान आतापर्यंतचे दुसरे सर्वोच्च ठरले. पश्‍चिम किनारपट्टीवरील केरळ, कर्नाटकसह कोकणात उष्णतेची लाट होती. सध्या सौम्य 'ला-निना' स्थिती असून लवकरच तटस्थ 'एल-निनो'' निर्माण होण्याचे संकेत आहेत. ही स्थिती कायम राहणार असल्याने मॉन्सूनवर कोणताही प्रभाव पडणार नाही.

दरम्यान, यंदाच्या उन्हाळ्यात देशाच्या बहुतांश भागात कमाल तापमान सरासरीपेक्षा अधिक राहण्याची शक्यता हवामान खात्याने वर्तवला आहे. या कालावधीत सकगळीकडे किमान तापमान देखील सरासरीच्या वर राहण्याची शक्यता अधिक आहे. मार्च महिन्यापासूनच तीव्र उष्ण लाटा येण्याचा इशारा हवामान खात्याकडून देण्यात आला आहे. देशातील महाराष्ट्र, राजस्थान, गुजरात, हरियाना, पंजाब, मध्य प्रदेश, उत्तर प्रदेश, बिहार, झारखंड, पश्चिम बंगाल, ओडिशा, छत्तीसगड, तेलंगण, आंध्र प्रदेश आणि कर्नाटकच्या उत्तर भागांत उष्णतेचा तीव्र लाटा येण्याची शक्यता हवामान खात्याने वर्तवली आहे. त्यामुळे नागरिकांनी काळजी घ्यावी असे आवाहन देखील हवामान खात्याने केले आहे.