Maharashtra Weather Update News: एकीकडे राज्यात कमालीचा उडाका जाणवत असतानाच परतीच्या पावसाचा धुमाकूळही पाहायला मिळत आहे. हवामानामध्ये होणाऱ्या बदलामुळे नागरिकही हैराण झाले असून पावसामुळे शेतकऱ्यांचेही मोठे नुकसान झाले आहे. आज (ता. २१, ऑक्टोबर) राज्यात विविध भागात मुसळधार पाऊस कोसळण्याची शक्यता असून हवामान विभागाने अलर्ट जारी केला आहे.

राज्यात सध्या ऊन पावसाचा खेळ पाहायला मिळत आहे. एकीकडे महाराष्ट्रातील विविध जिल्ह्यांमध्ये पावसाचा कहर सुरू असतानाच ‘ऑक्टोबर हीट’चा चटकाही जाणवत आहे. सकाळी ऊन आणि संध्याकाळी पाऊस अशीच स्थिती काही भागात पाहायला मिळत आहे. विदर्भ, मराठवाड्यात उन्हाचा चटका चांगलाच त्रासदायक ठरत आहे. पावसाला पोषक हवामान असल्याने आज (ता. २१) वादळी वारे, विजांसह पावसाच्या सरी कोसळण्याची शक्यता असल्याने सतर्कतेचा इशारा (येलो अलर्ट) कायम असल्याचे हवामान विभागाने म्हटले आहे.

आज कोकणामधील रत्नागिरी, सिंधुदुर्ग, पालघर, ठाणे, मुंबई, रायगड या जिल्ह्यांमध्ये तर मध्य महाराष्ट्रात पुणे, सांगली, सातारा, कोल्हापूर, सांगली, सोलापूर, नंदुरबार, धुळे , जळगाव, नाशिक, अहिल्यानगर, मराठवाड्यामधील छत्रपती संभाजीनगर, जालना, बीड, धाराशिव, लातूर, नांदेड आणि बुलडाणा, अकोला, अमरावती, वाशीम, यवतमाळ या जिल्ह्यांमध्ये विजांच्या कडकडाटासह पावसाचा इशारा देण्यात आला आहे.

दरम्यान, रायगडसह कोकणात परतीच्या पावसाने चांगलाच धुमाकूळ घातला आहे. रोज वादळी वारे, विजांच्या कडकडाटासह जोरदार पाऊस पडतो आहे. पावसाळा संपला असून परतीचा थांबण्याचे नाव घेत नाही. दरम्यान अनेक ठिकाणी ढग फुटी सदृष्य पाऊस देखील कोसळत असून याचा थेट फटका भातशेती करणाऱ्या शेतकऱ्याला बसला आहे. परतीच्या पावसामुळे कापणी योग्य भाताचे पिक शेतातील चिखलात पडले असून ते अंकूरले आहे.